މީގެ އަހަރެއްހާ ދުވަސް ކުރިން ސޮއިކޮށްފައި ވަނީ އަދާލަތު ޕާޓީ އަށް ކަމަށާއި އެހެން ނަމަވެސް އޭނާގެ ރަޖިސްޓްރީ މިހާރު އޮތީ އެމްޑީޕީގައި ކަމަށް ބުނެ ފޭދޫގެ ޖަވާހިރު ޤުރުއާން ކުލާސް ހިންގާ އަބްދުއްލަތީފް މިއަދު ކަންބޮޑުވުން ފާޅުކޮށްފި އެވެ.
އެމްޑީޕީ އަށް އަބަދު ވެސް ވަރަށް ބޮޑަށް ފާޑު ކިޔާ އެހެން ނަމަވެސް ރައްޔިތުންގެ މަޖިލީހުގެ ފޭދޫ ދާއިރާގެ ގޮނޑި ފުރުއްވާ އަލްހާން ފަހުމީގެ ބޮޑު ބޭބެ ލަތީފްގެ އެފްބީ ސްޓޭޓަސްގައި މިއަދު ބުނެފައި ވަނީ އޭނާގެ ޕާޓީގެ ސިއްރުން ބަދަލުކޮށްފައި ވަނީ އިލެކްޝަން ކޮމިޝަނުން ކަމަށެވެ.
"އަހަރެން މީގެ އަހަރެއްހާ ދުވަސް ކުރިން ސޮއި ކުރީ އަދާލަތު ޕާޓީ އަށް. އެ ޕާޓީގެ ރަޖިސްޓްރީގައި އަހަރެންގެ ނަން އޮންނާނެ. އެކަމަކު ކުއްލިއަކަށް އަހަރެންގެ ނަން އެމްޑީޕީގެ ރަޖިސްޓްރީގައި މިހާރު އެބަ އޮތް. މިއީ ބައެއް މީހުން މީހުންގެ ސިއްރު މައުލޫމާތުތައް ވަގަށް ނަގައިގެން ކުރާ ކަމެއް،" ސ. ފޭދޫ ގެދަރު ލަތީފް ބުންޏެވެ.
އޭނާ ބުނީ ފަހަރެެއްގައި މިކަން އެމްޑީޕީ އަށް ނޭނގި އޮވެދާނެ ކަމަަށެވެ. އެހެން ނަމަވެސް މެމްބަރުންގެ ޕާޓީ ރަޖިސްޓްރީ ބަދަލުވާ ނަމަ އެކަން އިލެކްްޝަން ކޮމިޝަނަށް އެނގޭނެ ކަމަށް ލަތީފް ބުންޏެވެ.