މީގެ ކުރިން އާންމުކޮށް އިވޭ އަޑަކީ ބޮލީވުޑުން ބޭރުގެ ފިލްމްތައް ކޮޕީ ކުރާ ވާހަކަ އެވެ.
ހާއްސަކޮށް ހޮލީވުޑްގެ ފިލްމްތަކުގެ ވާހަކަތަކުން އިންސްޕައާވެގެން ހިންދީ ފިލްމްތައް ހުއްޓުމެއް ނެތި ހަދަމުން އަންނަ ވާހަކަ އެވެ.
އެކަމަކު މި ފަހަރު ދިމާވެފައި މި އޮތީ އެހެން ގޮތެކެވެ.
ބޮލީވުޑްގެ މަޝްހޫރު އަދި ކުޅަދާނަ ޑައިރެކްޓަރު ސަންޖޭ ބަންސާލީ 2005 ވަނަ އަހަރު ގެނެސް ދިން ކާމިޔާބް ފިލްމް "ބްލަކް" ތުރުކީ ބަހުން އުފެއްދި ވާހަކަ އެވެ. އަދި އެއީ ބަންސާލީ އަށް ވެސް އެންގުމަކާ ނުލައި، އޭނާގެ ހުއްދަ ނެތި އެވެ.
"ބެނިމް ދުނިއާމް" ގެ ނަމުގައި އުފައްދާފައިވާ މި ފިލްމް ސިނަމާތަކަށް އަންނާނެ ކަމަށް ބުނެފައި ވަނީ މި މަހުގެ 25 ގަ އެވެ. އަދި ބައެއް މީޑިއާ ރިޕޯޓްތައް ބުނާ ގޮތުގައި މި ފިލްމް އުފައްދާފައި ވަނީ ބަންސާލީގެ ހުއްދަ ހޯދައިގެން "ބްލަކް" ގެ ރަސްމީ ރިމެކިންއެއްގެ ގޮތުގަ އެވެ.
އެހެން ނަމަވެސް މިކަން ބަންސާލީއަށާއި އޭނާގެ ޕްރޮޑަކްޝަން ހައުސްއަކަށް ނޭނގެ އެވެ. މިކަން ބަންސާލީ އަށް އެނގުނީ ވެސް "ބެނިމް ދުނިއާމް" ގެ ޓްރެއިލާ ފެނުނު ރައްޓެއްސަކު ގުޅާފައި އެ ވާހަކަ ބުނުމުންނެވެ.
އެހާ ތަނުން ބަންސާލީ އާއި އޭނާގެ ޕްރޮޑަކްޝަން ހައުސް އިން ތުރުކީގެ އެ ފިލްމްގެ ޓްރެއިލާ ބަލާލި އިރު ކަމުދާކަށް ނެތެވެ. ފިލްމް އޮތީ ޝޮޓުން ޝޮޓަށް "ބްލަކް" ކޮޕީކޮށްލައިފަ އެވެ.
އެހެންވެ ބަންސާލީ މިހާރު ނިންމާފައި ވަނީ ހުއްދައެއް ނެތި އޭނާގެ ހައްގަކަށް އަރައިގެންފައި ވާތީ، "ބެނިމް ދުނިއާމް" އުފެއްދި ފަރާތްތަކާ ދެކޮޅަށް ދައުވާ ދައުވާ ކުރާށެވެ. މި ފިލްމް ޑައިރެކްޓްކޮށްފައި ވަނީ ތުރުކީގެ ޑައިރެކްޓަރެއް ކަމަށްވާ އުގޫރު ޔުސެލް އެވެ.
އެކަން ކުރަން ވާން ޖެހޭ ތައްޔާރީތައް ބަންސާލީގެ ޕްރޮޑަކްޝަނުން މިހާރު އަންނަނީ ކުރަމުންނެވެ.
މި މައްސަލާގައި "ބްލެކް" ގެ ރިމެކިން ރައިޓްސް އާ ނުލާ އެ ފިލްމް ކޮޕީކޮށްފައިވާތީ ތުރުކީ ފިލްމް އުފެއްދި ފަރާތާ މެދު ބަންސާލީ އާއި އޭނާގެ ޓީމުން ގާނޫނީ ފިޔަވަޅު އަޅާނެ އެވެ.
"ބްލަކް" އަކީ އަޑު ނީވޭ، ނުފެންނަ އަދި ވާހަކަ ވެސް ނުދެއްކޭ ޒުވާން އަންހެން ކުއްޖެއްގެ އަނދިރި ހަޔާތުން އޭނާ ނެރެ ދިނުމަށް، އުމުރުން ދުވަސްވީ ޑޮކްޓަރަކާއި އެ އަންހެން ކުއްޖާގެ އާދަޔާ ހިލާފް ވާހަކަ ކިޔައިދޭ ހިތްގައިމު ފިލްމެކެވެ.
އަމީތާބް ބައްޗަން އާއި ރާނީ މުކަރްޖީ ލީޑް ރޯލް ކުޅުނު މި ފިލްމަކީ ފާޑު ކިއުންތެރިންގެ ވަރަށް ބޮޑު މަގުބޫލް ކަމެއް ލިބިގެން ދިޔަ ފިލްމެކެވެ.
"ބްލަކް" ގެ ރިމެކިންއެއް ތުރުކީގެ ކުންފުންޏަކުން އުފެއްދި އިރު، އެ ފިލްމް ރިލީޒް ކުރި ދުވަސްވަރު އެމެރިކާ އާއި ސްޕެއިންގެ ބައެއްް ޕްރޮޑަކްޝަން ހައުސްތަކުން ވެސް "ބްލެކް" ގެ ރިމެކިން ރައިޓްސް ގަތުމަށް މަސައްކަތްކޮށްފައިވެ އެވެ.
"ހަމް ދިލް ދޭ ޗުކޭ ސަނަމް" އާއި "ދޭވްދާސް" ފަދަ ކާމިޔާބް ފިލްތައް ޑައިރެކްޓްކޮށްފައިވާ ބަންސާލީގެ ފުރަތަމަ ފިލްމް "ހާމޯޝީ: ދަ މިއުޒިކަލް" ވެސް 1996 ގައި ރިލީޒް ކުރި ދުވަސްވަރާ ދިމާކޮށް، ހަމަ އެ ފިލްމްގެ ވާހަކަ ކޮޕީކޮށްގެން ސްޕެއިންގެ ކުންފުންޏަކުން ވަނީ "ބިޔޯންޑް ސައިލެންސް" ގެ ނަމުގައި ފިލްމެއް އުފައްދައިފަ އެވެ.
ބަންސާލީގެ ދެން އެންމެ އަވަހަށް ރިލީޒް ވަނީ އަންނަ މަހުގެ 15 ގައި ރިލީޒް ކުރާ މިއުޒިކަލް ޑްރާމާ "ރާމް ލީލާ" އެވެ.