މި މަހުގެ 13 ވާ އާދީއްތަ ދުވަހަކީ ސަރުކާރު ބަންދު ދުވަހެއްގެ ގޮތުގައި ހަމަޖައްސަވައި، އެ ދުވަހުގެ ބަދަލުގައި ނޮވެމްބަރު މަހުގެ 23 ވާ ހޮނިހިރު ދުވަހަކީ، އޮފީސްތައް ހުޅުވާ ދުވަހެއްގެ ގޮތުގައި ރައީސުލްޖުމްހޫރިއްޔާ ހަމަޖައްސަވައިފި އެވެ.
މިމގޮތަށް ރައީސުލްޖުމްހޫރިއްޔާ ހަމަޖެއްސެވީ، މި މަހުގެ 13 ވާ އާދީއްތަ ދުވަހު އޮފީސްތައް ހުޅުވޭ ގޮތަށް އޮވެއްޖެ ނަމަ، އަޟްޙާ ޢީދާ ގުޅިގެން ޗުއްޓީގަ އާއި އަދި އެ ނޫން އެހެން ބޭނުންތަކުގައި ރަށުން ބޭރަށް ދާން ބޭނުންވާ މުވައްޒަފުންނަށް ދަތިތަކެއް ކުރިމަތި ވެދާނެތީ، އެކަމަށް ލުޔެއް ދެއްވުމުގެ ގޮތުންނާއި، މެދުކެނޑުމެއް ނައިސް ބަންދު ދުވަސްތައް މުވައްޒަފުންނަށް ލިބޭ ގޮތަށް ހަމަޖައްސަވައި ދެއްވުމަށްޓަކަ އެވެ.
މި ގޮތަށް ހަމަޖެއްސެމުން އަޟުޙާ ޢީދުގެ ބަންދަށް ފަހު ސަރުކާރުގެ އޮފީސްތައް ހުޅުވޭނީ، މި މަހުގެ 20 ވާ އާދީއްތަ ދުވަހު އެވެ.