އެމްޑީޕީގެ ހަބަރުތައް ފަތުރާ ރާއްޖެ ޓީވީ ހިންގަމުންދާ ބީކޭޓީ ބިލްޑިންގުގައި އަލިފާން ރޯކޮށްލައިފި އެވެ.
މިކަމުގެ މަޢުލޫމާތު ފުލުހުންނަށް ލިބިފައި ވަނީ ރޭ ފަތިހު 04:45 އެހާކަށްހާ އިރު ކަމަށް ފުލުހުން ބުންޏެވެ.
އެ ސަރަޙައްދުގައި ފުލުހުންނާއި ސިފައިން މިހާރު އަންނަނީ ހަރަކާތްތެރިވަމުންނެވެ.
ފުލުހުން ބުނީ މިހާތަނަށް މަޢުލޫމާތު ލިބިފައިވާ ގޮތުގައި އެ އިމާރާތުގައި އަލިފާން ރޯކޮށްލާފައި ވަނީ އެތަނުގައި އެވަގުތު ޑިއުޓީ އަށް ހުރި ބިދޭސީ މީހަށް ތޫނު އެއްޗަކުން ހަމަލާދީ ޒަޚަމްކޮށްލުމަށްފަހު އެވެ. މީގެ އިތުރުން އެ އިމާރާތުގެ ބިއްލޫރިގަނޑެއް ވެސް ވަނީ ތަޅާލައިފަ އެވެ.
ތޫނު އެއްޗަކުން ހަމަލާ ދިނުމުގެ ސަބަބުން ބިދޭސީ މީހާގެ ބުރަކަށިން ތަނެއް ޒަޚަމްވެފައިވާ އިރު ފުލުހުންގެ އެހީތެރިކަމާ އެކު އައިޖީއެމް ހޮސްޕިޓަލަށް ގެންދެވި އޭނާ އަށް އަންނަނީ ފަރުވާ ދެމުންނެވެ.
މިކަމާ ގުޅިގެން އެމްޑީޕީން މިއަދު ނެރުނު ބަޔާނެއްގައި ބުނީ ރާއްޖެ ޓީވީގެ އިމާރާތުގައި ރޯކޮށްލާ ދިން އަގު ނުކުރެވޭ ބޮޑު ގެއްލުމާއި އެއިމާރާތް ބަލަހައްޓަން އިން މީހާ އަށް ދިން އަނިޔާވެރި ހަމަލާ އާއި، އެ އިމާރާތުގައި ދިރިއުޅެމުންދާ އެންމެހާ ފަރާތްތަކުގެ ފުރާނަ އަށް ނުރައްކާވާ ފަދަ މި އުދުވާނީ އަމަލު އެއީ އެ ޕާޓީ ނުހަނު ހިތާމަ ކުރާކަމެެއް ކަމަށެވެ.
އަދި އެ އަނިޔާވެރި އަމަލަކީ މީޑިއާގެ މިނިވަންކަން މިގައުމުން ފޮހެލާ ހުދުމުހުތާރު އަނިޔާވެރިކަން ގައުމުގައި ފެތުރުމަށް ބަޔަކު އަޑީގައި ތިބެ ރާވާފައިވާ ފިނޑި އަދި އެހާމެ ނުރައްކާތެރި އަމަލެއް ކަމުގައި ދެކޭ ކަމަށެވެ.
"ދިވެހި އާއްމު ރައްޔިތުންނަށާއި، ރާއްޖޭގެ މިނިވަން ނޫސްވެރިކަމަށް ދެވޭ މި ފަދަ ބޮޑެތި ހަމަލާތައް ދުވަހުން ދުވަހަށް އިތުރުވަމުންދާކަން މި ޕާރޓީން ހިތާމައާއެކު ފާހަގަ ކުރަމެވެ. އަދި މި ނުބައި އަމަލަކީ ރާއްޖޭގެ މިނިވަން ނޫސްވެރި ކަމަށް އޮތް ގޮންޖެހުންތަކާއި ނޫސްވެރިންނަށް ރައްކާތެރިކަން ނެތްކަން ހާމަވެގެންދާ ހެއްކެއް ކަމުގައި ދެކެމެވެ." ބަޔާނުގައިވެ އެވެ. "ޤާނޫނު އަސާސީން ފުލުހުންނާ މަތިކޮށްފައިވާ އެންމެ މުޙިއްމު ވާޖިބަކީ މުޖުތަމަޢުގެ އަމަން އަމާންކަމާއި ރައްކާތެރިކަން ދެމެހެއްޓުމާއި، ދިވެހި ރާއްޖޭގައި އުޅޭ އެންމެހައި މީހުން ޙިމާޔަތްކޮށްދީ އެބައި މީހުންގެ މުދަލާ ގެދޮރު ރައްކާތެރިކޮށް ދިނުން ކަމަށް ވީހިނދު، މިއަދުގެ މި ހިންގި ނުބައި އަމަލުން ރާއްޖެ ޓީވީ އާއި އެޓީވީގެ ނޫސްވެރިންނަށް ރައްކާތެރިކަމެއް ނުލިބި، ފުލުހުން އެމީހުންގެ ދައުރު އަދާ ކުރުމުގައި ނުކުޅެދިފައިވުމީ މި ޕާޓިން ނުހަނު ކަންބޮޑުވާ ކަމެކެވެ. އަދި މި ހިނދުން މިހިނދަށް ރާއްޖެ ޓީވީގެ އިމާރާތް ރޯކޮށްލައި މި ދިން ހަމަލާ ވަގުތުން ބަލައި ތަޙްޤީޤްކޮށް، އެ ޖަރީމާ ހިންގި ފަރާތްތަކާއި ރާއްޖެ ޓީވީއަށް ހިމާޔަތް ދިނުމުގައި އިހުމާލް ވިފާރާތްތައް ހޯދާ ޝަރީޢަތުގެ ކުރިމައްޗަށް ޙާޒިރު ކުރުމަށް ކަމާބެހޭ ހުރިހާ މުއައްސަސާއަކަށް މި ޕާޓީން ގޮވާލަމެވެ."
ރާއްޖެ އަށް ޓީވީ އަށް ދިން ހަމަލާ "އައްޑޫ ލައިވް" އިން ވެސް އެންމެ ހަރުކަށި އިބާރާތުން ކުށްވެރި ކުރަމެވެ.