ކޮވިޑް-19 ކޮންޓްރޯލް ކުރުމަށް މާލެ ސަރަަހައްދުގައި އަޅާ ފިޔަވަޅެއްގެ ގޮތުން ފިހާރަކަތާއި ކެފޭ ރެސްޓޯރަންޓްތައް ހުޅުވާފައި ބެހެއްޓޭނެ ގަޑިތަކަށް ބަދަލުގެނެސްފިއެވެ.
އިކޮނޮމިކް މިނިސްޓްރީން ބުނެފައިވަނީ، ކޮވިޑް-19 އާއި ގުޅިގެން އަޅާފައިވާ ފިޔަވަޅުތަކަށް ބަދަލު ގެނެސްފައިވާތީ މިއަދުން ފެށިގެން، ފިހާރަތައް ހުޅުވާފައި ބެހެއްޓޭނެ ގަޑިއަކީ ފަތިހު 5:00 އިން ރޭގަނޑު 10:30 އަށް ކަމަށެވެ.
މީގެއިތުރުން ސައިހޮޓާ، ކެންޓީން، ކެފޭ، ރެސްޓޯރަންޓް ފަދަ ކާބޯތަކެތީގެ ޚިދުމަތްދޭ ތަންތަން ވެސް ހުޅުވާފައި ބެހެއްޓޭނެ ގަޑިއަކީ ފަތިހު 5:00 އިން ރޭގަނޑު 10:30 އަށްކަމަށް އިކޮނޮމިކް މިނިސްޓްރީން މައުލޫމާތުދެއެވެ.
އިކޮނޮމިކް މިނިސްޓްރީން ބުނެފައިވަނީ ކަސްޓަމަރުންނަށް ހިދުމަތްދޭ ތަންތަނުން ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ ގައިޑްލައިންތަކާއި އެއްގޮތަށް އަމަލުކުރަންވާނެ ކަމަށެވެ.
މާލޭގައި ކޮވިޑް-19 ފެތުރޭ މިންވަރު އިތުރުވެ، އެޗްޕީއޭއިން ވެސް ވަނީ ފިޔަވަޅުތައް ވަރުގަދަ ކޮށްފައެވެ. އެގޮތުން ރޭގަނޑު 11:00 އިން ފެށިގެން ބޭރުގައި އުޅުން މަނާކޮށްފައިވާއިރު ރޭގަނޑު 08:30 އިން ފެށިގެން ވެހިކަލް ދުއްވުންވަނީ މަނާކޮށްފައެވެ.