އައްޑޫ ސިޓީ މީދޫގައި އިސްލާމިކް ޔުނިވާސިޓީ އޮފް މޯލްޑިވްސް (އައިޔޫއެމް) ގެ ކޯސްތައް ފެށުމާއި ގުޅޭ ގޮތުން މަޝްވަރާކޮށްފިއެވެ.
އިސްލާމިކް ޔިނިވާސިޓީގައި މިއަދު އޮތް ބައްދަލުވުމެއްގައި ކޯސްތަކާއި ގުޅޭ ގޮތުން މަޝްވަރާ ކުރައްވާފައިވަނީ އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް އާއި އިސްލާމިކް ޔުނިވާސިޓީގެ ވައިސް ޗާންސެލަރ ޑރ. ޒަކަރިއްޔާ މޫސާ އާއި މެނޭޖިން ޑިރެކްޓަރ މުހައްމަދު ނަސީމުއެވެ.
މި މަޝްވަރާ ބައްދަލުވުމުގައި މިއަހަރު އިސްލާމިކް ޔުނިވަސިޓީން އައްޑޫގައި ކުރިއަށް ގެންދާ ކޯސްތަކާއި ވަކިން ހާއްސަ ގޮތެއްގައި މީދޫގައި ކުރިއަށް ގެންދާނެ ކޯސްތަކާއި ގުޅޭ ގޮތުން ވަނީ މަޝްވަރާ ކުރައްވާފައެވެ.
އިސްލާމިކް ޔުނިވާސިޓީގެ ކެމްޕަހެއްގެ ގޮތުގައި މީދޫ ޝަމްސުއްދީން ސްކޫލް ބޭނުން ކުރުމަށް ވަނީ ނިންމާފައެވެ.
ޝަމްސުއްދީން ސްކޫލް މިވަގުތު އެއްވެސް ބޭނުމަކަށް ބޭނުންނުކުރާ އިރު އެތަނަށް ވަނީ ބޮޑެތި ގެއްލުންތަކެއް ދީފައެވެ.
މީދޫ ޝަމްސުއްދީން ސްކޫލް ބަންދުކޮށްފައިވަނީ އެތަނުގެ ދަރިވަރުން ސ. އަތޮޅު މަދަރަސާއަށް ބަދަލުކުރުމާއި ގުޅިގެންނެވެ.