ސ. ގަން އިންޓަނެޝަނަލް އެއާޕޯޓް ތަރައްގީ ކުރުމުގެ މަޝްރުއޫގެ ދަށުން ބިން ހިއްކުމުގެ މަަސައްކަތް ކުރިއަށްދާ އިރު މިހާތަނަށް ފައިސާ ލިބިފައި ވަނީ ހަމައެކަނި ބިން ހިއްކަން ކަމަށް އެއާޕޯޓް ހިންގާ އައްޑޫ އިންޓަނެޝަނަލް އެއާޕޯޓް (އޭއައިއޭ) އިން ބުނެފި އެވެ.
އެ ކުންފުނީގެ މެނެޖިން ޑިރެކްޓަރު ޝާހިދު އަލީ (ޝާޑް) ޓީވީއެމް އަށް ދެއްވި އިންޓަވިއުއެއްގައި ވިދާޅުވެފައި ވަނީ މިހާތަނަށް ފައިސާ ހޯދިފައި ވަނީ އެއާޕޯޓް ތަރައްގީ ކުރުމުގެ މަސައްކަތުގެ ތެރެއިން ކުރިއަށް ގެންދާ ބިން ހިއްކުމުގެ މަައްކަތަށް އެކަނި ކަމަށެވެ.
އެހެން ނަމަވެސް އިތުރަށް ބޭނުންވާ ފައިނޭންސް ހޯދުމުގެ މަސައްކަތް ކުރިއަށްދާ ކަމަށް އޭނާ ވިދާޅުވި އެވެ.
އެއާޕޯޓްގެ ބިން ހިއްކުމުގެ މަސައްކަތް ކުރަމުން އަންނަނީ ދުބާއީގެ ގަލްފް ކޮބްލާ އިންނެވެ. މި މަޝްރޫއަށް 11 މިލިއަން ޑޮލަރު ހަރަދުވެ އެވެ.
އޭއައިއޭ އިން ބުނީ ބިން ހިއްކުމުގެ މަސައްކަތް ނިމުމާ އެކު، އެ ސަރަހައްދުގައި ރިވެޓްމަންޓް ޖަހައި ރަންވޭގެ މަސައްކަތް ފެށިގެން ދާނެ ކަމަށެވެ.
އަދި ސީ ޕްލޭން ބޭސްގެ މަސައްކަތް ވެސް ބިން ހިއްކައި ނިމުމުން ފެށޭނެ ކަމަށް އެ ކުންފުނިން ބުންޏެވެ.
ގަން އެއާޕޯޓް ތަރައްގީ ކުރަން ހިންގާ މަޝްރޫއުގެ ދަށުން ރަންވޭ ދިގުކޮށް، ރަންވޭ ރިސާފޭސްކޮށް، ސީ ޕްލޭން ބޭސްއެއް ހަދައި، ޓާމިނަލަށް ވެސް ބޮޑެތި ބަދަލުތަކެއް ގެންނަން ވަނީ ނިންމައިފަ އެވެ.
ެއޭއަައިއޭ އާ އެކު މި މަސައްކަތުގައި މަޝްހޫރު ވިޔަފާރިވެރިޔާ ޗަމްޕާ ހުސައިން އަފީފްގެ ކާސާ ހޮލްޑިން ވެސް ބައިވެރިވެ އެވެ.
އެގޮތުން އޭއައިއޭގެ 30 ޕަސެންޓް ހިއްސާ ކާސާ އަށް 60 މިލިއަން ރުފިޔާ އަށް ވަނީ ވިއްކާލައިފަ އެވެ.