ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އަހުމަދު ފާރިސް މައުމޫން ހައްޔަރުކުރުމަށް 2017 ވަނަ އަހަރު ކްރިމިނަލް ކޯޓުން ނެރުނު އަމުރަށް ހައިކޯޓުން ތާއީދުކޮށްފިއެވެ.
ދެހާސް ސަތާރަވަނަ އަހަރުގެ ޖުލައި 17 ވަނަ ދުވަހު ކްރިމިނަލް ކޯޓުގެ އަމުރެއްގެ ދަށުން ފާރިސް ހައްޔަރުކުރީ މަޖިލީހުގެ އޭރުގެ ރައީސް އަބްދުުﷲ މަސީހުގެ އިތުބާރު ނެތްކަމުގެ މައްސަލައާ ގުޅިގެން މެމްބަރުންނަށް ރިޝްވަތު ދެއްވި ކަމަށް ތުހުމަތުކޮށެވެ. އެ މައްސަލައިގައި ޝަރީއަތް ނިމެންދެން ފާރިސް ބަންދުގައި ބެހެއްޓުމަށްވެސް ކްރިމިނަލް ކޯޓުން އަމުރުކުރިއެވެ. އެހެން ނަމަވެސް އެ އަމުރު ފާރިސްގެ ފަރާޓުން އިސްތިއުނާފު ކުރުމުން ހައިކޯޓުން މިއަހަރު ވަނީ، ޝަރީއަތް ނިމެންދެން ފާރިސް ބަންދުކުރަން އަމުރުކުރީ ގޯސްކޮށް ކަމަށް ކަނޑައަޅާފައެވެ.
ފާރިސް ހައްޔަރުކުރުމަށް ނެރުނު އަމުރު އިސްތިއުނާފުކުރުމުން އެ މައްސަލައިގައި މިއަދު ހައިކޯޓުން ކުރި ހުކުމުގައި ބުނެފައިވަނީ، ފާރިސް ހައްޔަރުކުރަން ޕްރޮސެކިއުޓާ ޖެނެރަލް މެދުވެރިކޮށް ފުލުހުން ކޯޓަށް ހުށަހެޅި ހެކިތަކަށް ބަލާއިރު އޭނާގެ މައްޗަށް ތުހުމަތެއް އުފެދޭ މިންވަރުގެ ހެކި ހުރި ކަމަށެވެ. އަދި އޭނާ ހައްޔަރުކުރަން ޖެހޭ ސަބަބެއް ވެސް އޮތުމުން ހައްޔަރުކުރުމުގެ އަމުރު ނެރުނީ މަޖިލީހުގެ އިމްތިޔާޒްތަކާއި ބާރުތަކުގެ ގާނޫނުގެ ދަށުން މެމްބަރުން ހައްޔަރުކުރުމުގައި އަމަލުކުރަން ޖެހޭ އިޖުރާއާތު ފުރިހަމަ ކުރުމަށް ފަހު ކަމަށެވެ.
ހައިކޯޓުގެ ހުކުމުގައި ބުނެފައިވަނީ، އިތުބާރު ނެތްކަމުގެ މައްސަލައެއް މަޖިލީހަށް ހުށަހަޅާފައި ވަނިކޮށް މެމްބަރަކު ހައްޔަރު ނުކުރެވޭނެ ކަމަށް މަޖިލީހުގެ ގަވާއިދުގައި އޮތްނަމަވެސް އެ ހާލަތުގައި މެމްބަރުން ހައްޔަރުކުރުން އެއްކޮށް މަނާ ނުވާކަމަށެވެ.
މި މައްސަލަ ހައިކޯޓުގައި ބައްލަވާފައިވަނީ ފަނޑިޔާރު ހަސަން ޝަފީއު އާއި ފަނޑިޔާރު މުހައްމަދު ފައިސަލްގެ އިތުރުން ފަނޑިޔާރު އަބްދުއްރައޫފް އިބްރާހިމެވެ. މި ތިން ފަނޑިޔާރުންގެ އަޣުލަބިއްޔަތުން ވަނީ ފާރިސް ހައްޔަރުކުރުމަށް ކްރިމިނަލް ކޯޓުން ނެރުނު އަމުރަށް ތާއީދުކޮށްފައެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ފާރިސްގެ މައްޗަށް ގިނަ ދައުވާތަކެއް ވެސް އުފުލާފައިވެއެވެ. އެގޮތުން ފާރިސްގެ މައްޗަށް ރިޝްވަތުގެ ދައުވާ އާއި ޓެރަރިޒަމްގެ ދައުވާ އުފުލުމަށްފަހު ފަހުން ވަނީ އެ ދެ ދައުވާ އަނބުރާ ގެންގޮސްފައެވެ. އަދި ފާރިސްގެ މައްޗަށް ދެން އުފުލި ޝަހްޝު އޮޅުވާލުމުގެ ދައުވާ ސާބިތުވެ އޭނާ އަށް ވަނީ ހަތަރު މަހާއި 24 ދުވަހުގެ ޖަލު ހުކުމެއް އިއްވާފައެވެ. ނަމަވެސް އެ ހުކުމް ހައިކޯޓުން ފަހުން ވަނީ ބާތިލުކޮށްފައެވެ.