މި މަހުގެ 16 ވަނަ ދުވަހު ކައިވެންޏަށް އެއް އަހަރު ފުރުން ފާހަގަ ކުރާ ސައިފީނާގެ ނަމުން މަޝްހޫރުވެފައިވާ ސައިފް އަލީ ހާނާއި ކަރީނާ ކަޕޫރުގެ ފޮޓޯ ޝޫޓިންއެއް ރާއްޖޭގައި ދާދި ފަހުން ބާއްވައިފި އެވެ.
މި ފޮޓޯ ޝޫޓިން ބޭއްްވީ އއ. އަތޮޅުގެ ރިސޯޓެއްގައި ކަމަށް އެނގިފައިވެ އެވެ.
ސައިފާއި ކަރީނާގެ ކައިވެންޏަށް އެއް އަހަރު ފުރުމާ ދިމާކޮށް މަޝްހޫރު މެގަޒިން "ހާޕާސް ބާޒާރު" އަށް އެ ދެ ތަރިން ދޭ ހާއްސަ އިންޓަވިއުގައި ހިމެނުމަށް ބޭއްވި ފޮޓޯ ޝޫޓިންގައި ދެ ތަރިން ވެސް ފެންނީ ވަރަށް ހިތްގައިމު ގޮތަކަށެވެ.
އެގޮތުން މައިގަނޑު ގޮތެއްގައި ސައިފްގެ ލުކް ގެނެސް ދީފައި ވަނީ "ޖޭމްސް ބޮންޑް" ގެ ކެރެކްޓާ އާ ވައްތަރު ގޮތަކަށެވެ. އެކަމަކު އެއީ ހައިރާންވާންވީ ކަމެއް ނޫނެވެ.
ސައިފް އާއި ކަރީނާ އެންމެ ފަހުން އެކުގައި ކުޅުނު "އެޖެންޓް ވިނޯދް" ގައި ވެސް ސައިފް ފެނިގެން ގޮސްފައި ވަނީ ހަމަ އެފަދަ ކެރެކްޓާއަކުންނެވެ.
ފޮޓޯ ޝޫޓްގައި ކަރީނާ ފެންނަނީ ވަރަށް އަންހެންވަންތަކޮށް "ޗިކް" ލުކެއްގަ އެވެ.
އެ މެގަޒިންގެ އޮކްޓޯބަރު މަހުގެ އަދަދު ގެނެސް ދީފައި ވަނީ "މިސްޓަ އެންޑް މިސިޒް ހާން: ބްރައިޑްލް އިޝޫ" ގެ ގޮތުގަ އެވެ.
ސައިފާއި ކަރީނާގެ ކައިވެންޏަށް އެއް އަހަރު ފާހަގަ ކުރާ އިރު، މިއީ ސައިފްގެ ދެވަނަ އަދި ކަރީނާގެ ފުރަތަމަ ކައިވެންޏެވެ. ކުރީގެ ބަތަލާ އަމްރިތާ އާ ކައިވެނިކޮށް ސައިފަށް ވަނީ ދެ ކުދިން ވެސް ލިބިފަ އެވެ.
އެގޮތުން ސާރާ އާއި އިބްރާހީމަކީ މިހާރު ފުރާ ވަރަށް އަރާފައި ތިބި ދެ ކުދިންނެވެ.
ސައިފް އާއި ކަރީނާ ރައްޓެހިވެން އުޅުނު ދުވަސްވަރު ވެސް ރާއްޖެ އަށް އެކި ފަހަރުމަތިން ޗުއްޓީ ހޭދަ ކުރަން އަައިސްފައިވެ އެވެ.
މި ދެ ތަރިން އެކުގައި ދެން އެންމެ އަވަހަށް ފެންނާނެ ފިލްމަކީ ސައިފް ޕްރޮޑިއުސްކޮށް ލީޑް ރޯލް ކުޅޭ "ހެޕީ އެންޑިން" އިންނެވެ.
އެހެން ނަމަވެސް މި ފިލްމްގައި ކަރީނާ ފެނިގެން ދާނީ ހާއްސަ ފެނިލުމަކުންނެވެ.