ރައްޔިތުންގެ މަޖިލީހުގެ ލައިބްރަރީ މިއަދު ހުޅުވައިފި އެވެ.
ރައްޔިތުންގެ މަޖިލީހުގެ ގިނަ ދުވަސްވީ ލިޔުންތަކާއި ޔައުމިއްޔާތަކާއި، މަޖިލީހުގެ ކަން ހިންގަމުންދިޔަގޮތުގެ ލިޔުންތަކާއި އަދި ކުރީއްސުރެ ފަށައިގެން އުފެދިގެން އައި ޤާނުނުތައް ފެންނަގޮތަށް ރައްޔިތުންގެ މަޖިލީހުގެ ކުތުބުޚާނާ އަދި ޑިޖިޓަލް އަރކައިވް ހުޅުވައި ދެއްވީ ރައިސުލްޖުމްހޫރިއްޔާ އިބްރާހިމް މުހައްމަދު ސޯލިހެވެ.
ރައްޔިތުންގެ މަޖިލީހުގެ ކުތުބުޚާނާއިން މިވަގުތު ފޯރުކޮށްދެމުންދާ ޚިދުމަތްތަކުގެ ތެރޭގައި މަޖިލީހުގެ މެންބަރުންނަށާއި މުވައްޒަފުންނަށް ފޮތް ދޫކުރުމުގެ ޚިދުމަތްތަކާއި، ރިފަރެންސްގެ ޚިދުމަތްތަކާއި އަދި ކޮމްޕިއުޓަރ ޓާމިނަލްތަކުގެ ޚިދުމަތްތައް ހިމެނެއެވެ. މަޖިލީހުގެ ކުތުބުޚާނާގެ ޚިދުމަތް ކޮންމެ އާދިއްތައަކުން ބުރާސްފައްޗެއްގެ ހެނދުނު 8:30 އިން މެންދުރު 13:30 އަށް އަދި ރަމަޟާން މަހު ކޮންމެ އާދިއްތަ ދުވަހަކުން ބުރާސްފައްޗެއްގެ ހެނދުނު 9:30 އިން މެންދުރު 12:30 އާއި ހަމައަށް ލިބޭނެ ކަމަށް މަޖިލީހުގެ އިދާރާއިން މައުލޫމާތުދެއެވެ.
ރައްޔިތުންގެ މަޖިލީހުގެ ކުތުބުޚާނާއިން ލިބެން ހުރި މަޢުލޫމާތުތައް ބެހިގެންވަނީ މައިގަނޑު ހަތަރު ދާއިރާއަކަށެވެ. އެއީ، ޢާންމު މަޢުލޫމާތު، ރިފަރެންސް، ދިވެހިރާއްޖެއާ ގުޅުންހުރި މަޢުލޫމާތު އަދި ޚާއްސަ ކަލެކްޝަންތަކަށެވެ. ޚާއްސަ ކަލެކްޝަންތަކުގެ ދަށުން ވެރިކަން ހިންގުމުގެ ބާރާއި، ޢަދުލު އިންސާފު ޤާއިމުކުރުމުގެ ބާރާއި، ޤާނޫނު ހެދުމުގެ ބާރާއި، މިނިވަން މުސްތަޤިއްލު މުއައްސަސާތަކާ ގުޅުންހުރި މަޢުލޫމާތުތަށް ލިބިގެންދާނެކަމަށް މަޖިލީހުގެ އިދާރާއިން މައުލޫމާތުދެއެވެ. އަދި، އާންމު ކަލެކްޝަނުން ގިނަވެގެން ކޮންމެވެސް ދެ ފޮތެއް 14 ދުވަސް ވަންދެން ގެންދިއުމުގެ ހުއްދަ މަޖިލީހުގެ ލައިބްރަރީގެ ޚިދުމަތްތަކުގެ ބޭނުންކުރައްވާ ފަރާތްތަކަށް ލިބޭނެ ކަމަށްވެސް މައުލޫމާތުދީފައިވެއެވެ.
މަޖިލީހުގެ ޑިޖިޓަލް އާކައިވް މެދުވެރިކޮށް ލިބެންހުރި މަޢުލޫމާތުތަކުގެ ތެރެއިން ދިވެހި ރައްޔިތުންގެ މަޖިލީހުގެ ތާރީޚާއި، މަޖިލީހުގެ ތާރީޚުގައި މިހާތަނަށް ބޭއްވި ޖަލްސާތަކާއި، އިއްވާފައިވާ ރިޔާސީ ބަޔާންތަކާއި، އަހަރީ ބަޖެޓުގެ މައުލޫމާތުތައް ފާހަގަކޮށްލެވޭއިރު، އޭގެ އިތުރަށްވެސް މުހިއްމު އެހެނިހެން މައުލޫމާތުތައް ތަފްސީލުކޮށް ލިބެން ހުންނާނެ ކަމަށް މަޖިލީހުން ބުނެފައިވެއެވެ.