މި ސަރުކާރުގެ ފުރަތަމަ ޖެންޑާ މިނިސްޓަރު ޝިދާތާ ޝަރީފް ރައީސް އިބްރާހިމް މުހައްމަދު ސޯލިހަށާއި، ކޯލިޝަން ލީޑަރުންނަށް ފާޑުވިދާޅުވެއްޖެއެވެ.
ޖެންޑާ މިނިސްޓަރުގެ މަޤާމުން އަމިއްލަފުޅަށް އިސްތިއުފާ ދެއްވިތާ އަހަރެއް ވުމާއި ގުޅިގެން ކުރެެއްވި ޓްވީޓެއްގައި ޝިދާތާ ވިދާޅުވެފައިވަނީ، ސިޔާސީ ހަލަބޮލި ކަމުގެ ތެރެއިން އެކަކަށް އެންމެ ބުރަ މަސައްކަތް މި ސަރުކާރު ގެންނަން ކުރިމީހަކަށް އޭނާވާނެ ކަމަށެވެ. އަދި ސަރުކާރު ގެނައީ އަނިޔާވެރިކަން ނިމުމަކަށް ގެނެސް އިންސާފު ޤާއިމު ކުރުމަށްކަމަށްވެސް ޓްވީޓްގައިވެއެވެ.
"އެހެނަސް އަމިއްލައަށް ގެނައި ސަރުކާރުގެ އެންމެ ބޮޑު ބޭއިންސާފަކާއި ހިތްދަތިކަމަކާއި ކުރިމަތިލީ މީހަކަށް ވާނެ އަޅުގަނޑު." ޝިދާތާގެ ޓްވީޓްގައިވެއެވެ.
އަދާލަތު ޕާޓީގެ ފޮރިން ރިލޭޝަންސް ކޮމިޓީގެ ޗެއާޕާސަންގެ މަގާމުވެސް ފުރުއްވާ ޝިދާތާ ވިދާޅުވީ އޭނާ މަގުމަތިކޮށް ބާކީކޮށްފައި ހުރުމަކީ ރައީސް ސޯލިހް ހިމެނޭހެން ކޯލިޝަންގެ ހުރިހާ ލީޑަރުން ލަދުގަންނަންޖެހޭނެ ކަމެއްކަމަށެވެ. އެހެންނަމަވެސް ސިޔާސީ ގޮތުން ފަހަތަށް ޖެހުމުގެ ވިސްނުމެއް ނެތްކަމަށް ޝިދާތާގެ ޓްވީޓްގައިވެއެވެ.
— Shidhatha Shareef (@iamshidhatha) February 6, 2021
ކުޑަކުދިންނަށް ޖިންސާ ފުރައްސާރަ ކުރުމުގެ މައްސަލަތައް އިތުރުވެ ދިމާވި ފާޑުކިޔުންތަކާއި އެކު ޝިދާތާ ޖެންޑާ މިނިސްޓަރުގެ މަގާމުން އަމިއްލަފުޅަށް އިސްތިއުފާދެއްވީ އޭނާ މަގާމުން ވަކިކުރުމުގެ މަސައްކަތް ރައްޔިތުންގެ މަޖިލީހުގެ އެމްޑީޕީއަށް ނިސްބަތްވާ މެމްބަރުން ފައްޓަވާނެކަމަށް ވިދާޅުވެ ވާހަކަދައްކަވަންފެށުމުންނެވެ.