އައްޑޫ ސިޓީ ހިތަދޫން ޕޮޒިޓިވްވި ދެމީހުންނާއި ކޮންޓެކްޓުވި އިތުރު މީހަކު ކޮވިޑު-19 އަށް ޕޮޒިޓިވްވެއްޖެއެވެ. އެއާއި އެކު މި ކްލަސްޓާއިން ކޮވިޑު-19 އަށް ޕޮޒިޓިވްވީ މީހުންގެ ޖުމްލަ އަދަދު 4 އަށް ވަނީ އިތުރުވެފައެވެ.
"އައްޑޫލައިވް"އަށް މައުލޫމާތު ލިބިފައިވާ ގޮތުގައި މިކްލަސްޓަ ގައި އިތުރަށް ޕޮޒިޓިވްވެފައިވަނީ އަންހެނެކެވެ.
އައްޑޫގެ މޭޔަރު އަބްދުﷲ ސޯދިގު (ސޯބެ) ވިދާޅުވީ މިއަދު ހިތަދޫން އެންމެ ފުރަތަމަ ޕޮޒިޓިވްވީ ދެ މީހުންނަކީ އޭވިއޭޝަން ކޮމާންޑުގެ ޓްރެއިނިންގ އަށް މާލެއިން އައި ބަޔަކާއި ކޮންޓެކްޓު ވެފައިވާ ބައެއް ކަމަށެވެ.
"މިއަދު ޕޮޒިޓިވްވީ ދެ މީހުންނަކީ އޭވިއޭޝަން ކޮމާންޑުގެ ފަރާތުން ގަމުގައި ބޭއްވި ޓްރެއިނިންގ އަކަށް ދިޔަ ބައެއް، އެހެންވީމާ ބޮޑަށް ބެލެވެނީ އެ ޓްރެއިނިންގ ތެރެއިން ބައްދަލުވެ ބަލި ފެތުރުނީހެން" ސޯބެ ވިދާޅުވިއެވެ.
ސޯބެ ވިދާޅުވީ އެ ޓްރެއިނިންގ އަށް އެއާޕޯޓުގައި މަސައްކަތް ކުރާ އެހެން މުވައްޒަފުން ގޮސްފައިވާ އިރު އެންމެންގެ ކޮންޓެކްޓު ޓްރޭސިންގެ މަސައްކަތް ކުރަމުން އަންނަ ކަމަށެވެ. އަދި ޒަރޫރީ ބޭނުމެއްގައި ނޫން ގޮތަކަށް އައްޑޫގެ އެއް އަވަށުން އަނެއް އަވަށަށް ދަތުރުކުރުން މިހާރު މަނާ ކުރެވިފައިވާ ކަމަށެވެ.
ހިތަދޫން މިހާތަނަށް ހަތަރު މީހުން ޕޮޒިޓިވްވެފައިވާ އިރު އައްޑޫ ސިޓީ ހުޅުމީދޫ އެމްޓީސީސީ ސައިޓުގައި މަސައްކަތް ކުރަމުންދިޔަ 18 ބިދޭސީއަކު ވެސް ވަނީ ޕޮޒިޓިވް ވެފައެވެ. އެ ކޭސްތަކާ ގުޅިގެން ހުޅުމީދޫ މިވަގުތު އޮތީ މޮނީޓަރިންގެ ހާލަތުގައެވެ.