ގދ. ތިނަދޫން މީހަކު ކޮވިޑު-19 އަށް ޕޮޒިޓިވްވުމާއި ގުޅިގެން އެރަށަށް އަރައި ފޭބުން ހެލްތު ޕްރޮޓެކްޝަން އެެޖެންސީ (އެޗްޕީއޭ) އިން މަނާކޮށްފިއެވެ.
ތިނަދޫން ކޮވިޑު-19 އަށް ޕޮޒިޓިވްވި މީހަކީ ހިތަދޫން އިއްޔެ ކޮވިޑު-19 އަށް ޕޮޒިޓިވްވީ މީހުންނާއި ކޮންޓެކްޓުވެފައިވާ މީހެކެވެ. އެމީހާއަކީ ކާޑެއްދޫ އެއާޕޯޓުގައި މަސައްކަތް ކުރާ މީހެކެވެ. އެމީހާވެސް ވަނީ އޭވިއޭޝަން ކޮމާންޑުގެ ފަރާތުން ސ. ގަމުގައި ބޭއްވި ޓްރައިނިންގ އަށް ގޮސްފައެވެ.
އެމީހާ ޕޮޒިޓިވްވުމާއި ގުޅިގެން އޭނާ މިހާރު ވަނީ ކަރަންޓީނު ކުރެވިފައެވެ. އަދި އޭނާ އާއި ކޮންޓެކްޓުވީ މީހުން ހޯދުމުގެ މަސައްކަތް ވަނީ ފަށާފައެވެ.
މައުލޫމާތު ލިބިފައިވާ ގޮތުގައި އެމީހާ ވަނީ ޓްރެއިނިން ނިންމުމަށް ފަހު ކާޑެއްދޫ އެއާޕޯޓަށް ވަޒީފާއަށް ނިކުމެފައެވެ.
މި މަހުގެ 3 ވަނަ ދުވަހުވެސް ތިނަދޫ މޮނިޓަރިން ހާލަތަށް ގެނެވުނެވެ. ތިނަދޫ އޭރު މޮނިޓަރިންނަށް ލީ އެރަށަށް ހާއްސަ ހުއްދައިގެ ދަށުން މާލެއިން އައި ބަޔަކު އެނބުރި މާލެ ދިއުމުން ނެގި ސާމްޕަލް ޕޮޒިޓިވްވުމާއި ގުޅިގެންނެވެ. އެ ހާދިސާ އާއި ގުޅިގެން ތިނަދޫން ނެގި ހުރިހާ ސާމްޕަލް ނެގެޓިވްވުމުން ފަހުން އެރަށުގެ މޮނިޓަރިންގެ ހާލަތު ވަނީ އުވާލާފައެވެ.