ސާކް ސަމިޓާ ދިމާކޮށް އައްޑޫގައި ބެހެއްޓި މޮޮނިއުމަންޓްތަކުގެ ތެރޭގައި ހިމެނޭ ނޭޕާލް މޮނިއުމަންޓް ހުރި ތަނުގައި އާ ވައްތަރެއްގެ "މޮނިއުމަންޓެއް" ބަހައްޓައިފި އެވެ.
ސ. ހިތަދޫ ބޮޑު މަގުގައި ހިތަދޫ ސްކޫލް ކުރި މައްޗާ ދިމާއަށް ބެހެއްޓި ނޭޕާލްގެ މޮނިއުމަންޓްގެ ބުޑުމަތީގައި ބަހައްޓާފައި ވަނީ ޖުމްހޫރީ ގުޅުމުގެ "މޮނިއުމަންޓެ" ކެވެ.
އެ މޮނިއުމަންޓުގައި ހުރީ ދޮންދީންޏަކާއި ޖުމްހޫރީ ގުޅުމުގެ ލޯގޯ އާ އެކު "އައްޑޫ ތަރައްގީ ގައިމު" ޖަހާފައިވާ ބައެކެވެ.
އެ ބުޑް މަތީގައި މިފަދަ "މޮނިއުމަންޓެއް" ބެހެއްޓުމުން ސޯޝަލް މީޑިއާގައި އޭގެ ފޮޓޯއެއް އާންމުކޮށް، އެކި ގޮތްގޮތަށް އަންނަނީ ކޮމެންޓް ކުރަމުންނެވެ.
ބައެއް މީހުން އެއީ "އަނެއްކާ ބުދެއް ނޫންތޯ" ސުވާލުކޮށްފައިވެ އެވެ.
ދެހާސް އެގާރަ ވަނަ އަހަރުގެ ސާކް ސަމިޓާ ދިމާކޮށް ހިތަދޫގައި ބެހެއްޓި ފްރޭމެއް ގޮތަށް އިން ނޭޕާލް މޮނިއުމަންޓްގެ ބުޑު ބަހައްޓާފައި ދެން ހުރި ބައި ވަނީ ވަގަށް ގެންގޮސްފަ އެވެ.
އެއީ ޑިސެމްބަރު 7، 2011 ގަ އެވެ.
ސާކްގެ އަށް ގައުމު ރަމްޒުކޮށްދޭ ގޮތަށް އައްޑޫގެ އެކި ދިމަދިމާގައި ބެހެއްޓި މޮނިއުމަންޓްތަކުން އެއްވެސް މޮނިއުމަންޓެއް މިހާރު ނެތެވެ.
އެއީ ބުދުތަކެއް ކަމަށް ބުނެ ގިނަ ބައެއްގެ ފާޑު ކިއުންތައް އަމާޒުވެގެން ބައެއް މޮނިއުމަންޓްތައް ސަމިޓް ނިމުނުތާ މާ ގިނަ ދުވަސްތަކެއް ނުވެ ނަގާފައިވާ އިރު، ބައެއް މޮނިއުމަންޓްތައް ވަގަށް ނަގައި ހަލާލުކޮށްލާފައިވެ އެވެ.