ސެޕްޓެމްބަރު މަހުގެ 7 ގައި ބޭއްްވި ރިޔާސީ އިންތިހާބުގެ ފުރަތަމަ ބުރު ސްޕްރީމް ކޯޓުން ބާތިލް ކުރުމާ ގުޅިގެން، އިންތިހާބުގެ ފުރަތަމަ ބުރު އަލުން މި މަހުގެ 19 ގައި ބާއްވަން އިލެކްޝަން ކޮމިޝަން (އީސީ) އިން ނިންމައިފި އެވެ.
އެ ކޮމިޝަނުން ބުނީ 19 ގައި އިންތިހާބުގެ ފުރަތަމަ ބުރު ބޭއްވުމަށް ފަހު، މި މަހުގެ 22 ގައުި ރަސްމީ ނަތީޖާ އިއުލާން ކުރާނެ ކަމަށެވެ.
އިންތިހާބް އަލުން ބޭއްވުމަށް ސްޕްރީމް ކޯޓުން ރޭ ހުކުމް ކުރުމާ ގުޅިގެން، ކުރިން ވެސް އިންތިހާބުގައި ވާދަ ކުރި ކެންޑިޑޭޓުންނާއި އެ ބޭފުޅުން ނިސްބަތްވާ ޕާޓީތަކުން ވަނީ ކެމްޕޭން ފަށައިފަ އެވެ.
އެހެން ނަމަވެސް މިހާރު އަަޑުތައް އިވޭ ގޮތުން އެމްޑީޕީގެ ރިޔާސީ ކެންޑިޑޭޓް އަދި ކުރީގެ ރައީސް މުހައްމަދު ނަޝީދާ ވާދަ ކުރެއްވުމަށް އެއް ކެންޑިޑޭޓަކު ނެރުމަށް ވެސް ބައެއް ޕާޓީތަކުން އަންނަނީ މިހާރު ވާހަކަ ދައްކަމުންނެވެ.