ޕީއެންސީގެ ނައިބު ރައީސް އިބްރާހިމް ޝުޖާއުއަށް މިއަދު ފުލުހަށް ހާޒިރުވުމަށް އަންގައިފިއެވެ.
މައުލޫމާތު ލިބިފައިވާ ގޮތުގައި ޝުޖާއު ފުލުހަށް ހާޒިރުކުރަނީ މިދިޔަ މަހުގެ 27 ވަނަ ދުވަހު އިދިކޮޅު ކޯލިޝަނުން މާލޭގައި ކުރިއަށްގެންދިޔަ މުޒާހަރާތަކާއި ގުޅިގެންނެވެ.
އެ މުޒާހަރާތަކާއި ގުޅިގެން ބަޔާންނެގުމަށް ޕީއެންސީގެ ރައީސް އަބްދުއްރަހީމް އަބްދުاللهވެސް އިއްޔެ ފުލުހަށް ހާޒިރުކޮށްފައިވެއެވެ. އަދުރޭ ވިދާޅުވީ ފުލުހަށް ހާޒިރުކުރީ މިދިޔަ މަހުގެ 27 ވަނަ ދުވަހު ދަރުބާރުގެ ކައިރީގައި ތިއްބައި އޭނާ ހައްޔަރަށް ގެންދިޔަ މައްސަލައިގައި ބަޔާން ނެގުމަށް ކަމަށެވެ. އެ މައްސަަލައާ ގުޅިގެން ފުލުހުން ތިން ތުހުމަތެއް ކުރައްވާ ކަމަށް އަދުރޭ ވިދާޅުވިއެވެ.
އެގޮތުން ފުލުހުން ތުހުމަތުކުރާ އެއް ކަމަކީ ފުލުހުން ބަންދުކޮށްފައި އޮތް ސަރަހައްދަކަށް ވަތްކަމުގެ ތުހުމަތު ކަމަށާއި، އަނެއް ތުހުމަތަކީ ފުލުހުންގެ ދައުރަށް ހުރަސް އެޅުން އަދި ތިންވަނަ ތުހުމަތަކީ ދަތުރުފަތުރުކުރަން އުނދަގޫވާ ގޮތަށް މަގު ބަންދުކޮށްގެން އިށީނދެ އިނދެ އަޑުގަދަ ކުރުމުގެ ތުހުމަތު ކަމަށް އަދުރޭ ވިދާޅުވިއެވެ.