މޯލްޑިވްސް އެއާޕޯޓު ކޮމްޕެނީ ލިމިޓެޑް (އެމްއޭސީއެލް)ގެ މެނޭޖިން ޑިރެކްޓަރ އަދި ސީއީއޯ ގޯޑަން އެންޑްރޫ ސްޓުއާޓްގެ މުސާރަ އާއި އިނާޔަތް ހާމަ ކުރުމަށް އެކުންފުނިން ދެކޮޅު ހަދައިފިއެވެ.
މައުލޫމާތު ހޯދުމާއި ލިބިގަތުމުގެ ގާނޫނުގެ ދަށުން އަމިއްލަ ފަރާތަކުން އެމްއޭސީއެލްއަށް މި މައުލޫމާތު ހޯދުމަށް ހުށަހެޅުމުން އެެކުންފުނިން ވަނީ އެ ފަދަ މައުލޫމާތަކީ އާއްމު ފަރުދުންްނަށް ދޭން ޖެހޭ މައުލޫމާތެއް ނޫންކަމަށް ބުނެ މައުލޫމާތު ނުދީ ހިފަައްޓާފައެވެ. މި މައްސަލަ އިންފޮމޭޝަން ކަމިޝްނާސް އޮފީހަށް ހުށަހެޅުމުން މިއަދު ވަނީ އެމައްސަލައިގެ އަޑުއެހުމެއް ބާއްވާފައެވެ.
އިންފޮމޭޝަން ކަމިޝްނާސް އޮފީހުގައި މިއަދު ބޭއްވި އަޑުއެހުމުގައިވެސް އެމްއޭސީއެލްއިން ވަނީ އެކުންފުންޏަކީ ދައުލަތު އިދާރާއެއް ނޫންކަމަށް ބުނެ މައުލޫމާތު ދޭން ދެކޮޅު ހަދާފައެވެ. އެކުންފުނިން ބުނީ މައުލޫމާތު ހޯދުމާއި ލިބިގަތުމުގެ ގާނޫނުގެ ދަށުން މައުލޫމާތު ހާމަ ކުރަން ޖެހެނީ ދައުލަތުގެ އިދާރާތަކުން ކަމަށެވެ.
އެމްއޭސީއެލްގެ ވާހަކަތަކަށް ރައްދު ދެއްވައި އިންފޮމޭޝަން ކަމިޝްނާ ހުސެއިން ފިޔާޒު މޫސާ ވިދާޅުވީ އެމްއޭސީއެލް އަކީ ދައުލަތުގެ އިދާރާއެއް ކަން ސާފުވާ ކަމަށެވެ. އަދި މި މައްސަލާގައި ފިނޭންސް މިނިސްޓްރީ އާއި އެކު މަޝްވަރާ ކުރައްވާނެކަމަށް ފިޔާޒު ވިދާޅުވިއެވެ.
ދައުލަތުގެ ކުންފުނިތަކުގެ އިސް ވެރިންގެ މާލީ މައުލޫމާތު ހޯދުމަށް މީގެ ކުރިންވެސް ދިނުމަށް ބައެއް ކުންފުނިތަކުން ވަނީ ދެކޮޅު ހަދާފައެވެ. އެފަދަ މައްސަލަތައް މީގެ ކުރިން ވެސް އިންފޮމޭޝަން ކަމިޝަނަށް ވަނީ ހުށަހަޅާފައެވެ.