ކޮވިޑް 19ގެ ކޭސްތަކެއް އައްޑޫން ފެނުމާއި ގުޅިގެން އައްޑޫ ސިޓީ މޮނިޓަރިންއަށް ލާފައިވާތީ މިއަދު ހަވީރު 4 އިން ފެށިގެން ވަކި ގޮތެއް އަންގަންދެން އައްޑޫގެ ކެފޭ، ރެސްޓޯރެންޓު އަދި ގާޑިއާތައް ބަންދުކޮށް ޑެލިވަރީގެ ހިދްމަތްދޭ ގޮތަށް އައްޑޫ ސިޓީ ކައުންސިލުން ނިންމައިފިއެވެ.
އައްޑޫ ކައުންސިލުން މިއަދު ކުރި އާއްމު އިއްލާނެއްގައި ބުނީ އައްޑޫ ސިޓީ މޮނިޓަރިންގއަށް ލާފައިވާތީ އާއި އައްޑޫގައި މިވަގުތު ކޮމިއުނިޓީ ސްޕްރެޑެއް އޮތްކަމަށް ލަފާކުރެވޭތީ، އެންމެހާ ރައްޔިތުންގެ ސަލާމަތާއި ރައްކާތެރިކަމަށްޓަކައި ހެލްތް ޕްރޮޓކްޝަން އެޖެންސީން އައްޑޫ ސިޓީގެ މޮނިޓަރިންގ ހާލަތު އުވާލަންދެން ނުވަތަ ކައުންސިލުން ވަކިގޮތެއް އަންގަންދެން 08 ފެބްރުއަރީ 2021 ގެ ހަވީރު 16:00 އިން ފެށިގެން އަންނަނިވި ފިޔަވަޅުތައް އެޅުމަށް ކައުންސިލުން ނިންމާފައިވެއެވެ.
1- އައްޑޫ ސިޓީގެ ކެފޭ ރެސްޓޯރެންޓްތަކުން ޓޭކް އަވޭ/ ޑެލިވަރީގެ ޚިދުމަތް ފިޔަވައި އާއްމުންނަށް ހުޅުވައިގެން ޚިދުމަތް ދިނުން ހުއްޓާލުން. ޓޭކްއަވޭގެ/ ޑެލިވަރީގެ ޚިދުމަތް ދެމުންގެންދާއިރު ނަގުދު ފައިސާ ބޭނުންނުކުރުމަށާއި ތަނުގެ މުވައްޒަފުން އެޗް.ޕީ.އޭގެ ގައިޑްލައިނާއި އެއްގޮތަށް ޢަމަލުކުރަމުންގެންދޭތޯ ކަށަވަރު ކުރުން.
2- އައްޑޫ ސިޓީގައި ގާޑިޔާތަކުން ދެމުންގެންދާ އެންމެހާ ޚިދުމަތްތައް ދިނުން ހުއްޓާލުން.
3- ކޮވިޑް19 އާއި ގުޅިގެން ފިހާރަތަކަށް މީހުން ވެއްދުމަށް ކަނޑައަޅާފައިވާ އަދަދަށްވުރެ ގިނައިން ފިހާރަތަކަށް މީހުން ނުވެއްދުމާއި އެހެނިހެން ރައްކާތެރިކަމުގެ ފިޔަވަޅުތައް އެޅުން.
4- އާއްމު މައިދާންތަކާއި ޕާކްތަކަށް މީހުން އެއްވެ ނޫޅުން.
ކައުންސިލނުން ވަނީ މި އެންގުމަށް ހުރިހާ ފަރާތްތަކުން ބޯލެނބުމަށް އެދިވަޑައިގެންފައެވެ.
އޭވިއޭޝަން ސެކިއުރިޓީ ކޮމާންޑުން ގަމުގައި ބޭއްވި ޓްރެއިނިން ޕްރޮގްރާމަކަށް ދިޔަ މީހުންގެ ތެރެއިން މިހާތަނަށް 15 މީހަކު ކޮވިޑު-19 އަށް ޕޮޒިޓިވްވެ، ގިނަ ބަޔަކާއި ބައްދަލުވެފައިވާތީ ކޮންޓެކްޓު ޓްރޭސިން ހެދުމާއި، ބަލި ޖެހިފައިވާ މީހުން ދެނެގަތުމަށް އައްޑޫ ވަނީ މޮނިޓަރިންގެ ހާލަތަށް ގެނެސްފައެވެ.