ޤައުމަށް ދެރަކަމެއް ލިބޭނެ އަދި ޤައުމަށް ގެއްލުމެއް ވެދާނެ އެއްވެސް ކަމެއް އެއްވެސް ފުލުހަކު ނުކުރުމަށް ކޮމިޝަނަރު އޮފް ޕޮލިސް ޢަބްދުﷲ ރިޔާޒް ގޮވާލައްވައިފި އެވެ.
ކޮމިޝަނަރު މިހެން ގޮވާލެއްވީ އިއްޔެ ހަވީރު އިސްކަންދަރު ބިލްޑިންގގައި ހުރިހާ ފުލުހުންނާއި ބައްދަލުކުރައްވައި ވާހަކަފުޅު ދައްކަވަމުންނެވެ.
މި ބައްދަލުވުމަކީ އޮޕަރޭޝަން ބްލޫވޭވްގެ މަސައްކަތް މި މަހުގެ 19 ވަނަ ދުވަހު ބާއްވާ ރިޔާސީ އިންތިޚާބުގެ ތާރިހުތައް އިޢުލާނު ކުރެވުމާއެކު ބޭއްވެވި ބައްދަލުވުމެކެވެ.
މި ބައްދަލުވުމުގައި ކޮމިޝަނަރު އޮފް ޕޮލިސް ދެއްކެވި ވާހަކަފުޅުގައި ވިދާޅުވީ ފާއިތުވެގެން ދިޔަ ދުވަސްތަކުގައި ދިވެހި ފުލުހުން ވަރަށް ބުރަކޮށް މަސައްކަތްކޮށް ޤައުމީ ފުލުހުންކަން ދިވެހި އެންމެހާ ރައްޔިތުންނަށް ވަނީ ފިސާރި ކެރިގެން ތިބެ ސާބިތުކޮށްދީފައި ކަމަށެވެ.
މި ގޮތުން ޢާއިލާތަކާއި ދުރުގައި އަތޮޅުތަކުގައި ގިނަ ޢަދަދެއްގެ ފުލުހުން މަސައްކަތް ކުރަމުން ދިޔަ އިރު މާލޭގައި ތިބި ފުލުހުން ރެއެއް ދުވާލެއް، ވަރުބަލިކަމެއް، ފޫހި ކަމެއް ނެތި ޤައުމީ ޚިދުމަތުގައި ދެމިތިބީ މިޤައުމު އަމާންކަމާއި ޞުލްޙަ މަސަލަސްކަންމަތީ ބޭއްވުމުގެ އަގުރި މަސައްކަތުގައިކަން ކޮމިޝަނަރު ފާހަގަ ކުރެއްވި އެވެ.
ކޮމިޝަނަރ އޮފް ޕޮލިސްގެ ވާހަކަފުޅުގައި ވިދާޅުވީ ހުރިހާ ފުލުހުން އަބަދުވެސް ޕްރޮފެޝަނަލް ކަމާއެކު ސާބިތުވެ ޤައުމީ ޚިދުމަތުގައި ދެމިތިބެން ޖެހޭނެކަމަށާއި ޤައުމަށް ދެރަކަމެއް ލިބޭނެ އަދި ޤައުމަށް ގެއްލުމެއް ވާނެ އެއްވެސް ކަމެއް އެއްވެސް ފުލުހަކު ކޮށްގެން ނުވާނެ ކަމަށެވެ. މިއާއެކު ޤާނޫނީ އަދި ޤައުމީ ވާޖިބު އަދާކުރުންމަތީ ސާބިތުކަމާއެކު ދެމިތިބުމަށް ކޮމިޝަނަރ އޮފް ޕޮލިސް ހުރިހާ ފުލުހުންނަށް އިލްތިމާސް ކުރެއްވިއެވެ.
ރިޔާޒް ވިދާޅުވީ ރާއްޖޭގެ ޝަރުޢީ ކޯޓުތަކުން ނިންމާ ނިންމުންތައް ތަންފީޒުކުރުމުގައި މޯލްޑިވްސް ޕޮލިސް ސަވިސް އަބަދުވެސް ފަސް ޖެހުމެއް ނެތި ސާބިތުކަންމަތީ ތިބޭނެ ކަމަށެވެ.
މިއާއެކު ފުލުހުންގެ ދައުރާއި ފުލުހުންގެ ވާޖިބު އަދާ ކުރާނީ ކެރި ތިބެގެންކަން ދިވެހި ފުލުހުން ދައްކުވައި ދޭކަން ކޮމިޝަނަރުގެ ވާހަކަފުޅުގައި ވިދާޅުވި އެވެ.
މީގެ އިތުރުން ޤާނޫނީ ގޮތުން ފުލުހުން ޖަވާބުދާރީވާން ޖެހޭ ކޮންމެ ޙާލަތެއްގައި ސާބިތުކަމާ އެކު ޖަވާބުދާރީ ވާނެ ކަމަށާއި މޯލްޑިވްސް ޕޮލިސް ސަވިސްގެ ޤަދަރާއި ޢިއްޒަތް ހިފެހެއްޓައި ފުލުހުންގެ މުޢައްސަސާ ދެމެހެއްޓުމަށް ވާން ޖެހުނު ކޮންމެ ޤުރުބާނީއެއް ވާން ހަމަ އެންމެ ފުލުހަކު ވެސް ފަސް ޖެހިގެން ނުވާނެ ކަމަށް ވެސް ކޮމިޝަނަރު ވިދާޅުވި އެވެ.
ރިޔާޒުގެ ވާހަކަފުޅުގައި ވިދާޅުވީ ސިޔާސީ ގޮތުން ފުލުހުންނަށް ލިބޭ ޙައްޤަކީ ހަމައެކަނި ވޯޓު ލުމުގެ ޙައްޤުކަން ފާހަގަ ކުރައްވަމުން އެއްވެސް ފުލުހަކު އެއްވެސް ފުލުހެއްގެ ވަޒީފާގައި ހުރެ ސިޔާސީ ޙަރަކާތެއްގައި ބައިވެރިވުމަކީ ޤާނޫނީ ކުށެއް ކަމަށާއި ކޮންމެ ފުލުހަކު ވެސް ޤާނޫނީ އިމުގެ ބޭރުން ކުރާ ކަންކަން ބެލުމުގެ ފުރުޞަތު ޕޮލިސް އިންޓަގިރިޓީ ކޮމިޝަނަށް އޮންނާނެކަން ޤަބޫލު ކުރަން ވާނެ ކަމަށެވެ.
އަދި ކޮންމެ ފުލުހަކު ވެސް ފަރުދީ ގޮތުން ކުރާ ކުށަކަށް އެ ފުލުހަކު ޖަވާބުދާރީވާން ޖެހޭނެކަން މި ބައްދަލުވުގައި ކޮމިޝަނަރު އޮފް ޕޮލިސް ހުރިހާ ފުލުހުންނަށް ހަނދާންކޮށް ދެއްވި އެވެ.