ގއ. މާމެންދޫގައި ރޭ ދެ ގްރޫޕެއްގެ ދެމެދުގައި ހިންގި މާރާމާރީއެއްގައި 17 އަހަރު ޒުވާނަކު މަރާލި މައްސަލާގައި ތިން މީހަކު ފުލުހުންގެ ބެލުމުގެ ދަށައް ގެންގޮސްފިއެވެ.
ރޭގެ މާރާމާރީގައި މަރާލާފައިވަނީ ގއ. މާމެންދޫ، ލިލީ އޮފް ދަ ވެލީ، އަހުމަދު އުދައްޔުއަށެވެ. މާމެންދޫ މާރާމާރީގައި ގްރޫޕަކުން ހަމަލާދީފައިވަނީ އުދައްޔު އާއި އޭނާގެ އޭނާގެ އެއްބަޑު އެއްބަފާ ބޭބެޔަށެވެ. މި ހާދިސާގައި އުދައްޔު މަރުވެފައިވަނީ ގއ. އަތޮޅު ހޮސްޕިޓަލަށް ގެންގޮސް ފަރުވާ ދެމުން ދަނިކޮށެވެ.
ފުލުހުން ބުނީ ރޭގެ މާރާމާރީ އާއި ގުޅިގެން ކޯޓު އަމުރެއްގެ ދަށުން ދިވެހި ތިން ފިރިހެނުން ހައްޔަރުކޮށްފައިވާ ކަމަށެވެ. އެއީ 27 އަހަރާއި، 23 އަހަރު އަދި 18 އަހަރުގެ މީހުންކަމަށް ފުލުހުން ބުނެއެވެ.
މި މައްސަލަ ސީރިއަސް މައްސަލައެއްްގެ ގޮތުގައި ބަލަމުން އަންނަ ކަމަށް ޕޮލިސް ކަމިޝްނާ މުހައްމަދު ހަމީދު ރޭ ވަނީ ވިދާޅުވެފައެވެ.
ހަމީދު ވިދާޅުވީ މިހާދިސާއާ ގުޅިގެން ހައްސަ އޮޕަރޭޝަނެއް މިހާރު މާމެންދޫގައި ފަށާފައިވާ ކަމަށެވެ. އަދި މާމެންދޫގެ ރައްޔިތުން ފުލުހުންނަށް އެއްބާރުލުން ދިނުމަށް ވެސް ހަމީދު ވަނީ އެދިފައެވެ.