ހުޅުމީދޫގައި ހުންނަ އެމްޓީސީސީ ސައިޓުން ބިދޭސީންތަކެއް ކޮވިޑު-19 އަށް ޕޮޒިޓިވްވުމާއި ގުޅިގެން ނެގި 100 ރެންޑަމް ސާމްޕަލްގެ ނަތީޖާ ނެގެޓިވްވެފައިވާ ކަމަށް ސ. ހުޅުމީދޫ ސިއްހީ މަރުކަޒުން ބުނެފިއެވެ.
ހުޅުމީދޫ ސިއްހީ މަރުކަޒުގެ މެނޭޖަރ އިބްރާހިމް ޒުބެއިރު (އިބުރޭ) މިއަދު "އައްޑޫލައިވް"އަށް ވިދާޅުވީ ހުޅުމީދޫން ކޮވިޑު ކޭސްތަކެއް ފެނުމާއި ގުޅިގެން އެ ރަށުން 100 ރެންޑަމް ސާމްޕަލް ނަގައި ޓެސްޓު ކުރި އިރު ނަތީޖާ ނެގެޓިވްވެފައިވާ ކަމަށެވެ.
"މިވަގުތަށް ނެގީ 100 ސާމްޕަލް، ހުރިހާ ސާމްޕަލް ނެގެޓިވްކަމަށް މައުލޫމާތު ލިބިފައިވަނީ" އިބުރޭ ވިދާޅުވިއެވެ.
ހުޅުމީދޫން ފުރަތަމަ ނެގި 100 ސާމްޕަލް ނެގެޓިވްވިޔަސް އަދިވެސް އެރަށް ވަނީ މޮނިޓަރިންގެ ހާލަތުގައެވެ. އެރަށުން ކޮވިޑު-19 އަށް ޕޮޒިޓިވްފައިވަނީ 25 ބިދޭސީންނެވެ. އެ އެންމެނަކީވެސް އެމްޓީސީސީ ސައިޓުގައި މަސައްކަތް ކުރަމުންދާ މީހުންނެވެ.
އައްޑޫ ސިޓީން އެންމެ ފުރަތަމަ ކޮވިޑު ކޭސްތަކެއް ފެނިފައިވަނީ ހުޅުމީދޫން މިދިޔަ ބުރާސްފަތި ދުވަހުއެވެ. އޭގެ ފަހުން މިދިޔަ ހޮނިހިރު ދުވަހު ހިތަދޫން ކޮވިޑު ކޭސްތަކެއްފެނި މުޅި އައްޑޫ ސިޓީ މިވަނީ މޮނިޓަރިންނަށް ލެވިފައެވެ.
އައްޑޫން މިހާރު ކޮވިޑަށ ޕޮޒިޓިވްވެފައިވާ މީހުންގެ ޖުމްލަ އަކީ 43 އެވެ.