ސ. ގަމުގައި ބޭއްވި އޭވިއޭޝަން ސެކިއުރިޓީ ކޮމާންޑުގެ ޓްރެއިނިންއަށް ދިޔަ މީހުންނާއި ގުޅުން ހުރި ކްލަސްޓަރ (އޭވިއޭޝަން ކްލަސްޓަރ) އިން އިތުރު 4 މީހުން ޕޮޒިޓިވްވެ، ޕޮޒިޓިވްވީ މީހުންގެ ޖުމްލަ އަދަދު 22 އަށް އަރައިފިއެވެ.
އައްޑޫގެ މޭޔަރ އަބްދުﷲ ސޯދިގު (ސޯބެ) ވިދާޅުވީ އިއްޔެ ހަވީރު 6 އިން ފެށިގެން މިހާ ހިސާބަށް މި ކްލަސްޓަރ އާއި ގުޅުން ހުރި ހަތަރު މީހަކު ޕޮޒިޓިވްވެފައިވާ ކަމަށެވެ.
މި ކްލަސްޓަރ އާއި ގިނަ ބަޔަކު ކޮންޓެކްޓު ވެފައިވާ އިރު މިހާރުވެސް ކޮންޓެކްޓުވި އަދަދު 100 އަށް ވުރެ އިތުރުވެފައިވާ ކަމަށް މައުލޫމާތު ލިބެއެވެ.
އައްޑޫ އިމަޖެންސީ އޮޕަރޭޝަން ސެންޓާރ (އޭއީއޯސީ) އިން ބޭއްވި ނޫސް ކޮންފަރެންސްގައި ވާހަކަ ދައްކަވަމުން ސޯބެ ވިދާޅުވީ އައްޑޫން ކޮވިޑު-19އަށް ގިނަ ބަޔަކު ޕޮޒިޓިވްވަމުން އަންނަނީ ކޮވިޑުގެ އާ ވޭރިއަންޓަކުން ކަމަށް ބެލެވޭކަމަށް ސިއްހީ މާހިރުން ވިދާޅުވެފައިވާކަމަށެވެ.
ސޯބެ ވިދާޅުވީ އައްޑޫގައި ކޮވިޑު ފެތުރެމުން އަންނަނީ ވަރަށް ބާރަށް ކަމަށާއި މިވަގުތު އައްޑޫގެ ހާލަތު ނާޒުކު ކަމަށެވެ.
އައްޑޫ ސިޓީގައި މިވަގުތު ކޮވިޑުގެ ދެ ކްލަސްޓަރ ވަނީ އުފެދިފައެވެ. އެއީ ހުޅުމީދޫގައި އޮތް އެމްޓީސީސީ ސައިޓުގެ ކްލަސްޓަ އާއި ގަމުގައި ބޭއްވި އޭވިއޭޝަން ސެކިއުރިޓީ ކޮމާންޑުގެ ޓްރެއިންނިން ތެރެއިން ބަޔަކު ޕޮޒިޓިވްވެ އުފެދިފައިވާ އޭވިއޭޝަން ކްލަސްޓަރ އެވެ.