އަންނަ އަހަރަށް ލަފާ ކުރައްވާ ދައުލަތުގެ ބަޖެޓާ ބެހޭ ގޮތުން ވަޒީރުންގެ މަޖިލީހުގައި މަޝްވަރާ ކުރައްވައި، ރައްޔިތުންގެ މަޖިލީހަށް ބަޖެޓް ހުށަހެޅުއްވުމަށް ވަޒީރުންގެ މަޖިލީހުން ނިންމަވައިފި އެވެ.
އިއްޔެ ބޭއްވެވި އެ މަޖިލީހުގެ ޖަލްސާގައި، 2014 ވަނަ އަހަރަށް ލަފާކުރައްވާ ދައުލަތުގެ ބަޖެޓް ތައްޔާރު ކުރެއްވުމުގައި، މައިގަނޑު ގޮތެއްގައި ބެއްލެވީ، ދައުލަތަށް ލިބޭ އާމްދަނީން ޚަރަދުތައް ހަމަޖެއްސެވުމުގެ މައްޗަށް ކަމަށް ވިދާޅުވެ، އެކަމުގެ ތަފްޞީލު މިނިސްޓަރު އޮފް ފިނޭންސް އެންޑް ޓްރެޜަރީ އަލްފާޟިލް ޢަބްދުﷲ ޖިހާދު، މަޖިލީހަށް ދެއްވި އެވެ.
މެންބަރުން ދެއްކެވި ވާހަކަފުޅުގައި، މި ވޭތުވެ ދިޔަ އަހަރުތަކުގެ ތެރޭގައި، ހިފެހެއްޓުމެއްނެތި ފުޅާވަމުން ގޮސްފައިވާ ބަޖެޓް ޑެފިސިޓްގެ ސަބަބުން އެކްސްޓަނަލް އިންބެލެންސް އާދަޔާ ޚިލާފަށް ފުޅާވެފައިވާކަން ފާހަގަ ކުރެއްވި އެވެ.
އަދި ދައުލަތަށް ލިބޭ އާމްދަނީ، މި ވޭތުވެ ދިޔަ އަހަރުތަކުގެ ތެރޭގައި އިތުރުވެފައިވީ ނަމަވެސް، ދައުލަތުގެ ޚަރަދު ބޮޑުވެފައި ވުމާއެކު، އާމްދަނީ ލިބޭނެ އިތުރު ގޮތްތަކެއް އަވަހަށް ހޯދުމުގެ މުހިންމު ކަމުގެ މައްޗަށް މެންބަރުން ވާހަކަފުޅު ދެއްކެވި އެވެ.