މަގާމުގެ ނުފޫޒު ބޭނުން ކުރައްވައިގެން ސީއެޗްއެސްއީ އަށް ކުދިން ވެއްދުމުގައި އަމަލު ކުރާ އުސޫލާ ހިލާފަށް، ކުދިން ވައްދަވާފައިވާ ކަމުގެ ތުހުމަތުގައި އެޑިއުކޭޝަން މިނިސްޓްރީގެ ކުރީގެ ސްޓޭޓް މިނިސްޓަރު އިމާދު ސޯލިހުގެ މައްޗަށް ދައުވާ ކުރުމަށް އެންޓި ކޮރަޕްޝަން ކޮމިޝަން (އޭސީސީ) އިން ޕްރޮސެކިއުޓާ ޖެނެރަލް (ޕީޖީ) ގެ އޮފީހަށް ފޮނުވައިފި އެވެ.
އޭސީސީން މިއަދު ބުނީ އިމާދުގެ މައްޗަށް ދައުވާ ކުރަން ފޮނުވާފައި ވަނީ މި އަހަރުގެ ޖޫން މަހު އެ ސްކޫލަށް 500 ކުދިން ވެއްދުމަށް އިއުލާން ކުރުމުން 700 އަށް ވުރެ ގިނަ ކުދިން ކުރިމަތިލާފައިވާ އިރު ޖާގަ ނުލިބުނު ކުދިންތަކުގެ ތެރޭގައި ހިމެނޭ ޝަރުތު ފުރިހަމަ ނުވާ ހަތަރު ކުއްޖަކަށް އެ ސްކޫލުގެ ކުދިންގެ ގޮތުގައި ހަމަޖައްސާފައިވާ ކަމަށް ބަޔާންކޮށް އެޑިއުކޭޝަނުން އެ ސްކޫލަށް ފޮނުވި ސިޓީއަކާ ގުޅިގެން ކަމަށެވެ.
ސީއެޗްއެސްއީ އަށް ކުދިން ވެއްދުމުގައި 70 ޕޮއިންޓަށް ވުރެ މަތިން ފާސް ވާން ޖެހެ އެވެ.
ގައުމީ ޕާޓީގެ ނައިބް ރައީސްގެ މަގާމުގައި ހުންނެވި އިމާދުގެ ބަޔާނަށް އިޝާރާތްކޮށް އޭސީސީން ބުނީ އެ ކުދިންނަށް ސީއެޗްއެސް އިން ޖާގަ ދީފައި ވަނީ ޖާގަ ދިން ހަތަރު ކުދިން ހެދުމަށް ބޭނުންވާ މާއްދާތައް އެކަނި ހެދެން އޮތީ ވިލާ ކޮލެޖުން ކަމަށާއި އެ ސްކޫލުން ޖާގަ ދެވެން ނެތް ކަމަށް އިމާދު ސޯލިހު ބުނެފައިވާ ކަމަށެވެ.
ނަމަވެސް އެޑިއުކޭޝަން މިނިސްޓްރީން ވިލާ ކޮލެޖުގައި އެ ފުރުސަތު އޮތްތޯ ބެލުމަށް ފޮނުވި ސިޓީއަކާ ގުޅިގެން ވިލާ ކޮލެޖުގައި އެ ޖާގަ އޮތް ކަމަށް ބުނެފައިވާ ކަމަށް ތަހުގީގަށް ފާހަގަ ކުރެވިފައިވާ ކަމަށް އޭސީސީން ބުންޏެވެ.
އަދި އެ ކުދިންގެ ތެރެއިން އެއް ކުއްޖަކަށް އެދަރިވަރު ކިޔެވި ސްކޫލުން އޭލެވެލް ހެދުމުގެ ފުރުސަތު ހަމަޖެހިފައިވާ ކަމަށް ވެސް އޭސީސީން މި މައްސަލަ ތަހުގީގުކޮށް ނެރުނު ބަޔާނުގައި ބުނެފައިވެ އެވެ.