ހުޅުމީދޫގައި ހުންނަ އެމްޓީސީސީ ސައިޓުން ކޮވިޑު-19 އަށް ޕޮޒިޓިވްވީ މީހެއްގެ ހާލު ސީރިއަސްވުމާއި ގުޅިގެން އިތުރު ފަރުވާއަށް ހިތަދޫއަށް ގެނައުމުގެ މަސައްކަތް ފަށައިފިއެވެ.
ހުޅުމީދޫ ސިއްހީ މަރުކަޒުގެ މެނޭޖަރ އިބްރާހިމް ދީދީ (އިބުރޭ) ވިދާޅުވީ އެމްޓީސީސީ ސައިޓުން ކޮވިޑަށް ޕޮޒިޓިވްވި ބިދޭސީއަކު ސީރިއަސް ކަމަށް މައުލޫމާތު ލިބިގެން ރޭ މަރުކަޒުގެ ޑޮކްޓަރުން ބެލުމަށް ފަހު އިތުރު ފަރުވާއަށް ހިތަދޫއަށް ގެންދިއުމުގެ މަސައްކަތް ކުރަމުން އަންނަ ކަމަށެވެ.
އިބުރޭ ވިދާޅުވީ އެ ސައިޓުގައި ކޮވިޑަށް ޕޮޒިޓިވްވެފައިވާ އެންމެންގެ މައުލޫމާތު ބަރާބަރަށް އޮންނަ އުސޫލުން ބަލަމުން އަންނަ ކަމަށެވެ. އަދި އެފަރާތްތަކަށް ބަރާބަރަށް ހުޅުމީދޫ ސިއްހީ މަރުކަޒުން އަންނަނީ ސިއްހީ ފަރުވާ ދެމުން ކަމަށެވެ.
އައްޑޫގައި ކޮވިޑަށް ސީރިއަސްވާ މީހުންނަށް ފަރުވާ ދިނުމަށް ހަމަޖެހިފައިވަނީ ހިތަދޫ ކުރީގެ ރީޖަނަލް ހޮސްޕިޓަލުގައެވެ. އެތަން ވަނީ ކޮވިޑު ފެސިލިޓީ އަށް ތަރައްޤީކޮށްފައެވެ.
އައްޑޫގައި މިވަގުތު ކޮވިޑަށް ޕޮޒިޓިވްވެފައިވާ 49 މީހުން އެބަތިއްބެވެ.