ކުރިއަށް އޮތް ލޯކަލް ކައުންސިލް އިންތިހާބުގައި ހުޅުދޫ ދާއިރާއަށް ވާދަކުރާ ޕީޕީއެމް ކެންޑިޑޭޓު މޫސާ ބުޝްރީ ނަން އަނބުރާ ގެންގޮސްފިއެވެ.
މޫސާ ބުޝްރީ މިއަދު "އައްޑޫލައިވް" ވިދާޅުވީ ނަން އަނބުރާ ގެންދިއުމަށް އޮންލައިންކޮށް އިލެކްޝަން ކަމިޝަނަށް ފޮނުވާފައިވާ ކަމަށެވެ.
މޫސާ ވިދާޅުވީ ނަން އަނބުރާ ނަގަނީ ރާއްޖެ މިއަދު އޮތް ހާލަތުން ހަމަ ހަމަ އުސޫލެއްގައި ކެމްޕެއިން ކުރުމަށް ފުރުސަތު ނެތުމުން ކަމަށެވެ. އަދި ނަން ނެގުމަށް އެއްވެސް ފަރާތެއް ނުފޫޒެއް ނެތްކަމަށް މޫސާ ވިދާޅުވިއެވެ.
މޫސާ ވިދާޅުވީ އިންތިހާބު އަަހަރަކަށް ވުރެ ދިގު މުއްދަތަކަށް ފަސް ކުރުމާއި ގުޅިގެން އަލުން ހާލަތު ހުރި ގޮތުން ކެމްޕެއިން ފަށައި ކުރިއަށް ގެންދެވެން ނެތްކަމަށެވެ. އަދި އެފުރުސަތުތަކަށް ސަރުކާރުން ހުރަސް އަޅަމުން އަންނަ ކަމަށް މޫސަ ވިދާޅުވިއެވެ.
މޫސާ ނަން ނެގުމާއި ގުޅިގެން އެދާއިރާގައި ދެން ވާދަ ކުރަން ތިބީ އެމްޑީޕީ ކެންޑިޑޭޓު ފައިޒުއް ރަހްމާން އާއި މިނިވަން ކެންޑިޑޭޓު މުހައްމަދު ޔާސީން، މިނިވަން ކެންޑިޑޭޓު އައްބާސް ވާފިރުއެވެ.