ސ. ގަމުގައި ބޭއްވި އޭވިއޭޝަން ސެކިއުރިޓީ ކޮމާންޑުގެ ޓްރެއިނިންއަށް ދިޔަ މީހުންނާއި ގުޅުން ހުރި ކްލަސްޓަރ (އޭވިއޭޝަން ކްލަސްޓަރ) އިން އިތުރު 6 މީހުން ޕޮޒިޓިވްވެ، އެ ކްލަސްޓަރ ގެ ޖުމްލަ އަދަދު 28 އަށް އަރައިފިއެވެ.
އައްޑޫގެ މޭޔަރ އަބްދުﷲ ސޯދިގު (ސޯބެ) ވިދާޅުވީ ފާއިތުވި ދެ ދުވަހު ނެގި ސާމްޕަލްގެ ތެރެއިން މިހާތަނަށް 6 މީހަކު ޕޮޒިޓިވްވެފައިވާ އިރު ޑައިރެކްޓު ކޮންޓެކްޓުގެ އަދަދު ބޮޑުތަން އިތުރުވެފައިވާ ކަމަށެވެ.
އޭވިއޭޝަން ކްލަސްޓަރ އުފެދިފައިވަނީ އެޗްޕީއޭގެ ގައިޑުލައިން އާއި ހިލާފަށް އޭވިއޭޝަން ސެކިއުރިޓީ ކޮމާންޑުގެ މުވައްޒަފުންތަކެއް ގ. ގަމަށް އައިސް ބޭއްވި ޓްރެއިނިންއަކަށް ފަހު އުފެދުނު ކްލަސްޓަރ އެކެވެ. މި ކްލަސްޓަރ ގެ އެއްބައި ގދ. ތިނަދޫގައި އޮތް އިތުރު ބޮޑު ބައި މިވަނީ އައްޑޫގެ ގުޅިފައިވާ ރަށްތަކާއި ގުޅިފައެވެ.
އައްޑޫގައި މިވަގުތު ދެ ކްލަސްޓަރ އޮތް އިރު ކޮވިޑު އެކްޓިވް ކޭސްގެ އަދަދު 55 އަށް ވަނީ އަރާފައެވެ.