މި އަހަރުގެ އަޞްހާ އީދު ނަމާދު ބޮޑު ޖަމާއަތެއްގައި ސ. ހިތަދޫ ޒޯން ސްޓޭޑިއަމްގައި ބާއްވަން ތައްޔާރުވަމުން އަންނަ ކަމަށް ހިތަދޫގެ ޖަމިއްޔާއެއް ކަމަށްވާ ނޫރުލް އިސްލާމް އިން ބުނެފި އެވެ.
ނޫރުލް އިސްލާމްގެ ރައިސް ޝެއިހް މުހައްމަދު އަނީލް ވިދާޅުވީ އަޞްހާ އީދު ނަމާދު ބޭއްވުމަށް ސްޓޭޑިއަމް ހަމަޖެހިފައިވާ ކަމަށެވެ.
މި އަހަރުގެ ފިޠުރު ނަމާދު ވެސް ސްޓެޑިއަމްގައި އިންތިޒާމް ކުރި ނޫރުލް އިސްލާމުން ބުނީ އެ ޖަމިއްޔާއިން އީދު ނަމާދަށް ސްޓޭޑިއަމް ތައްޔާރު ކުރަމުން އަންނަ އިރު ކުރީ ފަހަރުގެވެސް ގޮތަށް ހެޔޮ އެދޭ ފަރާތްތަކުގެ އެހީ ބޭނުން ކަމަށެވެ.
އީދު ނަމާދަކީ ޖަމާއަތުގައި އަންހެނުންނާއި ފިރިހެނުން އެއްކޮށް ކުރާ ނަމާދަކަށްވެފައި މި އަހަރުގެ ފިޠުރު އީދު ނަމާދުގައި ވެސް 3،000 އެއްހާ މީހުން ވަނީ ބައިވެރިވެ އެކުވެރި މާހައުލެއްގައި ވަގުތު ހިއްސާކޮށްފަ އެވެ.
ނޫރުލް އިސްލާމުގެ އަމާޒަކީ އަޟްހާ އީދު ނަމާދު 6،000 މީހުންގެ ޖަމާއަތަކާ އެކު ކުރުމެވެ.
އަނީލް ވިދާޅުވީ މިފަހަރުވެސް ރަށްރަށުން އަންނަ ބޭފުޅުންނަށް ބަސް ދަތުރު ހަމަޖެހިފައި އޮންނާނެކަމަށެވެ. އަދި މިފަހަރު ފިޠުރު އީދު ނަމާދަށް ހާޒިރުވި މީހުނަށް ވުރެ ގިނަ މީހުން ހާޒިރުވާނެކަމަށް ލަފާކުރައްވާނެ ކަމަށް އަނީލް ވިދާޅުވި އެވެ.
އަދި މިކަމަށް އެއްވެސް އެހީއެއް ވެދެއްވަން ބޭނުންފުޅު ފަރާތެއްވާ ނަމަަ 7676446 ނަންބަރަށް ގުޅައިގެން ހަމަޖެއްސުމަށް އެދިވަޑައިގަންނަވާ ކަމަށެވެ.
އީދު ނަމާދުގެ ކަންކަން އިންތިޒާމް ކުރުމުގައި އައްޑޫ ސިޓީ ކައުންސިލާއި ހިތަދޫ ޒޯން ސްޓޭޑިއަމްގެ އިސް ބެފޫޅުން ވެދެއްވާ އެހީތެރިކަމާއި އެއްބާރުލުމަށް އަނީލް ވަނީ ޝުކުރު ދަންނަވާފަ އެވެ.