ފަތުރުވެރިންތަކެއް ގޮވައިގެން ދަތުރު ކުރި މަންތާ އެއާލައިންގެ ސީޕްލޭނެއް ވެލާނާ އިންޓަނޭޝަނަލް އެއާޕޯޓަށް ޖައްސަން އުޅުމުގެ ތެރޭގައި ވެއްޓިއްޖެއެވެ.
މައުލޫމާތު ލިބިފައިވާ ގޮތުގައި ސީޕްލޭން ވެއްޓުނު ވަގުތު އޭގައި 6 ޕެސެންޖަރުންނާއި، 3 ފަޅުވެރިން ތިބިއެވެ.
މި ހާދިސާގައި އެކެއްގެ ކޮނޑުކަށިގަނޑު ނެއްޓި އަހެއް މީހެއްގެ ކޮނޑަށް ގެއްލުންތަކެއް ވަނީ ވެފައެވެ. އެމީހުންނަށް ފަރުވާ ދިނުމަށް ހުޅުމާލޭ ހޮސްޕިޓަލްގެ މެޑިކަލް ޓީމެއް ވަނީ އެއާޕޯޓަށް ގޮސްފައެވެ.
މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އިން ބުނީ ސީޕްލޭން ވެއްޓުނު ސަރަހައްދުގައި އެމްއެންޑީއެފް މާލޭ އޭރިއާގެ ކޯސްޓުގާޑުގެ ޑައިވަރުން ހަރަކާތްތެރިވަމުން އަންނަ ކަމަށެވެ.
މި ހާދިސާ އާއި ގުޅިގެން މަންތާއިން ނެރުނު ބަޔާނެއްގައި ބުނީ މިވަގުތު އެންމެ ބޮޑު އިސްކަމެއްް ދެނީ ބޯޓުން ދަތުރު ކުރި ފަރާތްތަކަށް މިވަގުތު ބޭނުންވާ އެހީތެރިކަން ފޯރުކޮށްދިނުމަށް ކަމަށެވެ.
އަދި މިކަން ހިނގާދިޔަގޮތް ސާފުވަމުންދާ ވަރަކަށް ހާމަކުރާނެ ކަމަށް މަންތާއިން ވަނީ ބުނެފައެވެ.