އެމްޑީޕީގެ އެންމެ ބޮޑު މަޝްރޫއުއަކީ ރައްޔިތުންގެ ސަރުކާރެއް އުފެއްދުން ކަމަށާއި ބާތިލް ކުރި ސެޕްޓެމްބަރު 7 ގެ ވޯޓަކީ އެންމެ އިންސާފުވެރި ވޯޓް ކަމަށް އެ ޕާޓީގެ ރިޔާސީ ކެންޑިޑޭޓް އަދި ކުރީގެ ރައީސް މުޙައްމަދު ނަޝީދު ވިދާޅުވެއް ޖެއެވެ.
ފ. މަގޫދޫގައި ރޭ ވާހަކަ ދައްކަވަމުން ތަރައްޤީ ހޯދުމަކީ އުމްރާނީ ބަދަލުތަކެއް އެކަނި ނޫންކަން އެއީ އިންސާނާ އަށް އަންނަ ބަދަލެއް ކަމަށް ނަޝީދު ވިދާޅުވި އެވެ.
އެ ބަދަލު އައުމަށް ޚިޔާލު ފާޅު ކުރުމުގެ މިނިވަންކަމާއި، އެއްވެ އުޅުމުގެ މިނިވަންކަމާއި، އަދި ވަކިން ހާއްސަކޮށް ވޯޓު ދިނުމުގެ ހައްގު ބޭނުންވާ ކަމަށް އެ މަނިކުފާނު ވިދާޅުވި އެވެ.
ތިރީސް އަހަރު ތަރައްޤީ ނުވެ ރާއްޖެ އޮތީ ސަރުކާރު އުފެދުމުގައި ރައްޔިތުންގެ ބައިވެރިވުން ނެތުމުން ކަމަށާއި، އޭރު ވޯޓު އޮޅުވާލުމާއި ވަކި ނަތީޖާއެއް ނެރެމުން ގެންދިޔައީ ސަރުކާރުން ރަށްރަށުގައި ބައިތިއްބައިގެން ކަމަށް ނަޝީދު ވިދާޅުވި އެވެ. އަދި އޭރު ސަރުކާރުގެ ކަންކަން އިންތިޒާމްވެފައި އޮތީ މަދު ބަޔަކަށް ފައިދާވާ ގޮތަށް ކަމަށް ވިދާޅުވި އެވެ.
ސަރުކާރެއް އުފެއްދުމަށް ބޭނުން ވަނީ ރައްޔިތުން ވޯޓުލުމުގެ ހައްގު ކަމަށާއި ސުޕްރީމް ކޯޓު ބާތިލްކޮށްފައި ވަނީ ރައްޔިތުންގެ ނިންމުން ކަމަށް ނަޝީދު ވިދާޅުވި އެވެ.
ބާތިލްކޮށްފައި އެ ވަނީ ގާނޫނީ ހުއްޖަތުތަކެއް ލިބިގެން ނޫންކަމަށާއި، އިންސާފްވެރި ގޮތެއްގައި އިންތިޚާބު ނުބޭއްވިގެން ވެސް ނޫން ކަމަށް އެ މަނިކުފާނު ވިދާޅުވި އެވެ.
ކޮންމެ ރަށަކަށް ގޮސް މައުލޫމާތު ސާފު ކުރުމުން އެނގިގެން ދަނީ 7 ސެޕްޓެމްބަރުގައި ނެގުނު ވޯޓަކީ މިހާތަނަށް ރާއްޖޭގައި ނެގުނު އެންމެ އިންސާފުވެރި ވޯޓު ކަމަށް ނަޝީދު ވިދާޅުވި އެވެ.
އިދިކޮޅު ފަރާތްތަކުން މަސައްކަތްކުރަމުން ދަނީ ޚުދުމުހުތާރު އުސޫލުތައް ދެމެހެއްޓުމަށް ކަމަށާއި، ސަލާމަތީ ބާރުތަކަށް އެންމެ މަތީ ވަލީ ހަވާލުކުރުމަށްކަމަށް ރައީސް ނަޝީދު ވިދާޅުވި އެވެ. އެމްޑީޕީން ނިކުމެ ތިބީ އެކަން ހުއްޓުވަން ކަމަށާއި ރައްޔިތުންނަށް ވޯޓު ދިނުމުގެ ހައްގު ހޯދައިދޭނެ ކަމަށް ނަޝީދު ވައުދުވެވަޑައިގެންނެވި އެވެ.
މުޅި ދިވެހި ރާއްޖެއިން އެމްޑީޕީ އަށް އެންމެ ބޮޑު އަޣްލަބިއްޔަތެއް ލިބުނީ އެމްޑީޕީކަން ފާހަގަކުރައްވާ ރޭގެ ޖަލްސާގައި މަގޫދޫ ރައްޔިތުންނަށް ނަޝީދު ޝުކުރު އަދާކުރެއްވި އެވެ.
އެމްޑީޕީގެ މެނިފެސްޓޯއަށް އަލިއަޅުވައިލައްވަމުން އެ މަނިކުފާނު ވިދާޅުވީ މެނިފެސްޓޯގައި 3 ވިޔަފާރިއެއް ހިމެނިފައިވާ ކަމަށާއި، އެމްޑީޕީން ހުށައަޅަނީ ތަރައްޤީގެ ސިޔާސަތު ކަމަށެވެ.
ފުރަތަމަ ބުރުން މަދުވީ 10،000 ވޯޓުކަން ފާހަގަ ކުރައްވާ ނަޝީދު ވިދާޅުވީ މިހާރު މި ތިބީ އެވޯޓު ހޯދައިގެން ކަމަށެވެ.
އަދި ކޮންމެ ދުވަހަކު އިންތިޚާބު ބޭއްވި ނަމަވެސް އެމްޑީޕީން އެއިންތިޚާބެއް ކާމިޔާބު ކުރާނެ ކަމަށް ނަޝީދު ވިދާޅުވި އެވެ.