ސ. މަރަދޫގައި މަސްވެރިކަމާ ގުުޅުން ހުރި ޕްރޮޖެކްޓެއް 25 އަހަރުގެ މުއްދަތަށް ކުރިއަށް ގެންދަން އައްޑޫ ސިޓީ ކައުންސިލާއި ސްޕެއިންގެ ސީ ޑައިނަމިކް އެސްއެލްޔޫ އާ ދެމެދު މިއަދު އެއްބަސްވުމެއްގައި ސޮއިކޮށްފި އެވެ.
ކައުންސިލްގެ ފަރާތުން އެއްބަސްވުމުގައި ސޮއި ކުރެއްވީ މޭޔަރު އަބްދުﷲ ސޯދިގް (ސޯބެ) އެވެ. ސީ ޑައިނަމިކްގެ ފަރާތުން ސޮއި ކުރެއްވީ އެ ކުންފުނީގެ މެނެޖިން ޑިރެކްޓަރެވެ.
ފަންސަވީސް އަހަރަށް ހެދި މި އެއްބަސްވުމުގެ ދަށުން، އެ މުއްދަތުގެ ތެރޭގައި ކައުންސިލަށް ސީ ޑައިނަމިކުން 282،000،00ރ. ދައްކަން ޖެހެ އެވެ.
އަދި އެ ކުންފުނީގެ މަސައްކަތުގައި 95 ޕަސެންޓް ދިވެހިން ހިއްސާ ކުރަން ޖެހެ އެވެ.
ކައުންސިލުން ބުނީ މި އެއްބަސްވުމުގެ ދަށުން މަރަދޫ ބަނދަރު މަތީގައި ސީ ޑައިނަމިކުން ކޮލްޑް ސްޓޯރޭޖަކާއި އައިސް ޕްލާންޓަކާއި މަސް ކަނޑަން ހާއްސަ ސަރަހައްދެއް ތަރައްގީކޮށް ހިންގާނެ އެވެ.
އެކަމަށް ބޭނުންވާ ބިން އީދު ބަންދު ނިމުމާ އެކު ސީ ޑައިނަމިކާ ހަވާލު ކުރަން ވަނީ ނިންމައިފަ އެވެ. މި މަޝްރޫއުގެ އަމަލީ މަސައްކަތް އަންނަ ޑިސެމްބަރު މަހުގެ ތެރޭގައި ފެށުމަށް ވަނީ ހަމަޖެހިފަ އެވެ.