ރައީސް އިބްރާހިމް މުހައްމަދު ސޯލިހް އަނގައިން 35،000 ފްލެޓް އަޅުއްވާފައިވާ ކަމަށް ނައިފަރު ދާއިރާގެ މެމްބަރު އަހުމަދު ޝިޔާމް ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަ ދައްކަވަމުން ޝިޔާމް ވިދާޅުވީ، މިސަރުކާރުން ސަލާމަތްނުވާ މިންވަރަށް ލޯނު ނަގާފައި އެބަހުރި ކަމަށާއި، އެހެންނަމަވެސް ކޮށްފައިހުރި ކަމެއް ފެންނަންނެތް ކަމަށެވެ.
ޝިޔާމް ވިދާޅުވީ ފްލެޓްގެ ވާހަކަ ދެއްކުމަކުން ނުނިމޭ ކަމަށާއި، ފްލެޓް އެޅޭނީވެސް އެކަންކުރަން އިނގޭ ބަޔަކަށް ކަމަށެވެ.
"މިހާރު ރައީސް އިބްރާހިމް މުހައްމަދު ސޯލިހް 3 އަހަރުގެ ރިޔާސީ ބަޔާނުގައި 35،000 ފްލެޓް ދިވެހި ރައްޔިތުންނަށް އަޅައިދެއްވައިފި. 35،000 ފްލެޓް ދިވެހި ރައްޔިތުންނަށް އަޅައި ދެއްވައިފި، އަނގައިން. ދޫފުޅުން. އެކަމަކު އަމަލަކުން އަޅުގަނޑުމެންނަށް ނުފެނިގެން މިއުޅެނީ." ޝިޔާމް ވިދާޅުވިއެވެ.
ޝިޔާމް ވިދާޅުވީ، "ކޮތަރުކޮށި" ކީ ނަމަވެސް ރައީސް ޔާމީންގެ ސަރުކާރުގައި 10،000 އާއިލާއަށް ބޯހިޔާވަހިކަން ފޯރުކޮށްދެވޭވަރަށް ފްލެޓްއަޅާފައިވާކަމަށެވެ.
ކުރީގެ ރައީސް އަދި މަޖިލީހުގެ ރައީސް މުހައްމަދު ނަޝީދުގެ ވެރިކަމުގައި ފްލެޓްތަކެއް އަޅާ މީހުނަށް އެތަންތަނުގައި އުޅެވޭނެ ގޮތް ވެފައިވާކަމަށާއި، އެހެންނަމަވެސް އެކަންކުރިއިރު، އެ މަސައްކަތް ހަވާލުކުރި ޓާޓާ ކުންފުންޏަށް ދިން އަގުގެ އިތުރަށް ދީފައިވާ ރަށްތަކާއި މުދަލަށް ބެލުމުން އެކަތި އަނެކެއްޗާ ބައްދަލުނޫންކަން އެނގޭކަމަށް ޝިޔާމް ވިދާޅުވިއެވެ.