ޖިންސީ ގޯނާގެ ދައުވާ އުފުލިފައިވާ ޓޫރިޒަމް މިނިސްޓަރު އަލީ ވަހީދު ރާއްޖެއިން ބޭރަށް ފުރާވަޑައިގެންނެވި މައްސަލަ ބަލައިދިނުމަށް އެދި ރައްޔިތުންގެ މަޖިލީހުގެ ރައީސް، މުހައްމަދު ނަޝީދަށް މަޖިލީހުގެ އަންހެން މެމްބަރުން ފޮނުވި މައްސަލަ ބެލުމަށް މަޖިލީހުގެ ޖުޑިޝަރީ ކޮމިޓީއަށް ފޮނުވައިފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަ ދައްކަވަމުން ރައީސް ނަޝީދު ވިދާޅުވީ އެ މައްސަލައިގައި ސިޓީއެއް ލިބިފައިވާކަމަށާއި، އަދި އެކަން ބެލުމަށް ޖުޑިޝަރީ ކޮމިޓީއަށް ފޮނުވާކަމަށެވެ.
އަލީ ވަހީދު ފުރި މައްސަލަ ބަލައިދިނުމަށް އެދިފައިވަނީ މަޖިލީހުގެ ނައިބު ރައީސް އީވާ އަބްދުﷲ އާއި ތުޅާދޫ ދާއިރާގެ މެމްބަރު ހިސާން ހުސެއިނާއި ހިންނަވަރު ދާއިރާގެ މެމްބަރު ޖީހާން މަހްމޫދުގެ އިތުރުން އައްޑޫ މީދޫ ދާއިރާގެ މެމްބަރު ރޮޒައިނާ އާދަމް އެވެ.
ޖިންސީ ގޯނާގެ ދައުވާ އުފުލިފައިވާ އަލީ ވަހީދުގެ ޕާސްޕޯޓު ކްރިމިނަލް ކޯޓުން ދޫކޮށްލުމާއެކު އޭނާ ވަނީ ރާއްޖެއިން ބޭރަށް ފުރާވަޑައިގެންފައެވެ. އެކަމާ ގުޅިގެން ސަރުކާރަށް ބޮޑެތި ފާޑުކިޔުންތަކެއް ވަނީ އަމާޒުވެގެން ގޮސްފައެވެ.
އެކަމާ ގުޅިގެން މަޖިލީހުގެ އަންހެން މެމްބަރުން ރައީސް ނަޝީދަށް ފޮނުއްވި ސިޓީގައި ވިދާޅުވީ ފުރުން މަނާކުރުމުގެ އަމުރު ބާތިލުކުރުމަށް ކޯޓުން ނިންމި އަޑުއެހުމުގައި އަލީ ވަހީދު ރާއްޖެއިން ބޭރަށް ފުރައިގެންދިޔުމަށް ޕްރޮސެކިއުޓަރ ޖެނެރަލްގެ އޮފީހުގެ ފަރާތުން އިއުތިޒާރުކޮށްފައި ނުވާ ކަމަށެވެ.
އަދި ސިއްހީ ފަރުވާ އަށް އަލީ ވަހީދު ރާއްޖެ އިން ބޭރަށް ފުރާވަޑައިގަންނަވަން ޖެހޭ ކަން ކަށަވަރު ކުރުމުގެ ގޮތުން ޑރ. ޔޫސުފް ޝާން ކޯޓަށް ހާޒިރުކޮށް އޭނާގެ ވާހަކަ އަޑުއެހި ކަމަށް ޕީޖީ އޮފީހުން ބުނާތީ އެފަދަ އިން އަމަލުކުރިތޯ އާއި މުޅި މި މައްސަލާގައި ވެސް އަމަލުކޮށްފައިވާ ގޮތް ބަލައިދިނުމަށް މެމްބަރުން ވަނީ އެދިފައެވެ.
މި މައްސަލައިގައި ޕީޖީން ބުނެފައިވަނީ އަލީ ވަހީދުގެ ޕާސްޕޯތް ދޫނުކުރުމަށް ކޯޓުގައި އެދުނު ކަމަށެވެ. އަދި އަލީ ވަހީދުގެ ޕާސްޕޯޓް ދޫކޮށްފައިވަނީ ގޯހުން ކަމަށާއި، އެހެންކަމުން އެ މައްސަލަ ހައިކޯޓުގައި އިސްތިއުނާފު ކޮށްފައިވާ ކަމަށެވެ.
އަލީ ވަހީދުގެ މައްޗަށް ހަތް ދައުވާއެއް އުފުލާފައިވެއެވެ. އޭގެތެރޭގައި ހިމެނެނީ، ޖިންސީ އަނިޔާކުރުމުގެ ކުށުގެ ދައުވާ، ރޭޕްކުރަން އުޅުމުގެ ކުށުގެ ދައުވާ، ބޭއަދަބީ ގޮތުގައި ޖިންސީ ގުނަވަން ހާމަކުރުމުގެ ކުށުގެ ދައުވާ، ޖިންސީ ގޯނާކުރުމުގެ ކުށުގެ ދައުވާ، ޖިންސީ ގޯނާކުރަން އުޅުމުގެ ކުށުގެ ދައުވާ އަދި ހުއްދަ ނޫން ޖިންސީ މުއާމަލާތެއް ހިންގުމަށް އެދުމުގެ ކުށުގެ ދެ ދައުވާ އެވެ.