ކޮމިއުނިކޭޝަން މިނިސްޓަރު މުހައްމަދު މަލީހް ޖަމާލްގެ އިތުބާރު ނެތްކަމުގެ މައްސަލާގައި ޖަވާބުދާރީވުމަށް އޭނާއަށް ނޯޓިސް ފޮނުވައިފިއެވެ.
މަލީހްގެ އިތުބާރު ނެތްކަމުގެ މައްސަލަ މަޖިލީހަށް ވައްދައިފައިވަނީ އެމްޑީޕީގެ ޕާލިމެންޓަރީ ގްރޫޕް (ޕީޖީ)ގެ ލީޑަރު އަލީ އާޒިމްއެވެ. މި މައްސަލަ މަޖްލީހަށް ހުށަހަޅާފައިވަނީ 14 މެމްބަރުންގެ ސޮޔާއި އެކުއެވެ.
މިއަދުގެ މަޖްލީހުގެ ޖަލްސާގައި އަލީ އާޒިމްވަނީ މަޖްލިސްގެ ރިޔާސަތުން މަލީހުގެ މައްސަލަ ގޮސްފައިއޮތް ހިސާބު ސާފު ކުރުމަށް ސުވާލު ކުރައްވާފައެވެ. މި ސުވާލަށް ޖަވާބު ދެއްވަމުން މަޖްލިސްގެ ރައީސް މުހައްމަދު ނަޝީދު ވިދާޅުވީ މަލީހަށް ސިޓީއަކުން ޖަވާބުދާރީވުމަށް ދަންނަވާފައިވާ ކަމަށެވެ.
މަޖިލިހުގެ ގަވައިދުގައިވާ ގޮތުން ވަޒީރެއްގެ އިތުބާރު ނެތްކަމުގެ މައްސަލައެއް ހުށަހަޅައިފި ނަމަ މަޖިލިހުގައި ބަހުސް ފެށުމުގެ 14 ދުވަސް ކުރިން އެ ވަޒީރަކަށް އެކަން އަންގަންޖެހޭނެއެވެ. އަދި އެ ބަހުސްގައި އަނގަ ބަހުންނާއި ލިޔުމުން ދިފާއުވުމުގެ ހައްގު އެ ވަޒީރަކަށް ލިބިވަޑައިގަންނަވާނެއެވެ.
ވަޒީރެއްގެ އިތުބާރު ނެތްކަމުގެ މައްސަލަ ފާސްވާނީ ވޯޓުގެ އައުލަބިއްޔަތު ލިބިގެންނެވެ.