ޓައީ އަޅާފައި ތިއްބަސް ހުތުރު ބަހުން ވާހަކަ ދައްކަން އެނގޭ ކަމަށް ވިދާޅުވެ ހައުސިން މިނިސްޓަރު މުހައްމަދު އަސްލަމް، ނޮޅިވަރަމު ދާއިރާގެ މެމްބަރު މުހައްމަދު ނަޝީދު އަބްދުﷲއަށް ރައްދު ދެއްވައިފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މިނިސްޓަރު އަސްލަމަށް މެމްބަރުން ސުވާލު ކޮށްފައިވާއިރު، ނޮޅިވަރަމު މެމްބަރު ނަޝީދު ވެސް ވަނީ މިނިސްޓަރު އަސްލަމަށް ސުވާލުކޮށްފައެވެ. އެހެންނަމަވެސް ރިޔާސަތުން މަޖިލީހުގެ ރައީސް މުހައްމަދު ނަޝީދު ވަނީ މެމްބަރު ނަޝީދުގެ ސުވާލު ވަކި ހިސާބަކުން ހުއްޓުވާފައެވެ. އަދި ވިދާޅުވީ، ގުޅޭ ސުވާލު މެމްބަރުން ކުރޭތޯ ރިޔާސަތުން ބަލާނެކަމަށެވެ.
"ފަރެސްމާތޮޑާ އެއާޕޯޓް ހަދާތަނުގައި ހުރި ރުއްތައް ގެނެސްފަ މަނިކުފާނު ކިހިނެއްތޯއޭ އެ ރުއްތަކަށް ހެދީ؟ ވިއްކާލީތޯ އޭ؟ އޭގެން ލިބުން ލާރިތޯއޭ ދުބާއީއަށް ޕައިލެޓެއްލައްވާ ތި ފޮނުވަނީ؟" މެމްބަރު ނަޝީދު މިނިސްތަރު އަސްލަމާއި ކުރެއްވި ސުވާލުގައިވެއެވެ.
އޭގެފަހުން އެހެން މެމްބަރަކު ކުރި ސުވާލަށް ޖަވާބު ދެއްވަމުން މިނިސްޓަރު އަސްލަމް ވަނީ ނަޝީދު ކުރެއްވީ ތުހުމަތެއް ކަމަށްވިދާޅުވެ އެވާހަކަތަކަށް ޖަވާބު ދެއްވާފައެވެ. އެގޮތުން މިނިސްޓަރު އަސްލަމް ވިދާޅުވީ، މަޖިލީހުގެ ފްލޯއަކީ އެތަނުގައި އެއްވެސް ވާހަކަައެއް ދައްކައިގެން އޭގެ ސަބަބުން ޤާނޫނީ އެއްވެސް ފިޔަވަޅެއް އެމީހެއްގެ މައްޗަށް އެޅޭތަނެއް ނޫންކަމަށެވެެ. އެހެންކަމުން އޭނާއާއި ގުޅޭގޮތުން އެއްވެސް އަސްލެއްނެތް ވާހަކައެއް ދައްކާކަމުގައިވާނަމަ އެކަމެއް ސާފު ކޮށްދޭންޖެހޭ ކަމަށެވެ.
އެގޮތުން މިނިސްޓަރު އަސްލަމް ވިދާޅުވީ ރުއްތަކެއް ވިއްކާލި ކަމަށް ކުރި ތުހުމަތަކީ އެއްވެސް ހަގީގަތެއް އެކުލެވިގެންނުވާ އަމިއްލަ ހިޔާލެއްގެ މައްޗަށް ދައްކާފައިވާ ވާހަކައެއް ކަމަށެވެ. އަދި ފަރެސްމާތޮޑާގެ އެއާޕޯޓްގެ ރަންވޭ އަޅާތަނުން ރުއް ގަސް ނަގާ ސާފުކުރީ ޓްރާންސްޕޯޓް މިނިސްޓްރީން ކުރި އިއުލާނެއްގެ ތެރެއިން އެކަން ކާމިޔާބު ކުރި މީހުންކަމަށެވެ. އަދި އެކަން ކުރި މީހުން އެމަސައްކަތުގައި ކޮށްފައިވާ ކަންކަމަކީ ކޮންޓްރެކްޓުގެ ދަށުން ކޮށްފައިވާ މަސައްކަތް ކަމަށްވެސް މިނިސްޓަރު އަސްލަމް ވިދާޅުވިއެވެ.
"ދުބާއީއަށް މީހަކު ފޮނުވި ވާހަކަ، ޕައިލެޓަކު ފޮނުވި ވާހަކަ. ކޮންމެފަދަ ވާހަކައެއްވެސް އިއްޒަތްތެރި މެމްބަރާއި ގުޅޭގޮތުން އަޅުގަނޑަށް ވެސް ދެއްކިދާނެ. އިއްޒަތްތެރި މެމްބަރާއި ބެހޭގޮތުން މާލެތެރޭގައި އިވޭ އަޑުތައް އަޅުގަނޑަކަށް މަދެއްނޫން. އެވާހަކަ އެހެންނަމަވެސް ރައްޔިތުންގެ މަޖިލީހުގެ މި ފްލޯގަ ދައްކާކަށް އަޅުގަނޑު ނެތިން. އެހެންވީމަ އިއްޒަތްތެރި މެމްބަރުން އެގޮތަށް އަޅުގަނޑުމެންނާ ވާހަކަ ނުދައްކަވާތި. އަޅުގަނޑުމެންނަކީ ވެސް މި މާލޭގައި ބޮޑުވެފައި ތިބި މީހުން. މާރީތިކޮށް މިހެން ޓައީ އަޅާފަ ތިއްބަސް ހުތުރުބަހުން ވެސް ވާހަކަ ދައްކަން އަޅުގަނޑަށް އިނގޭ." މެމްބަރު ނަޝީދަށް ރައްދުދެއްވާ މިނިސްޓަރު އަސްލަމް ވިދާޅުވިއެވެ.
މިނިސްޓަރު އަސްލަމްގެ ރައްދަށްފަހު މެމްބަރު ނަޝީދު މަޖިލީހުގައި އެކަމުގައި އިތުރަށް ވާހަކަ ދައްކަވާފައެއް ނުވެއެވެ.