ސެޕްޓެމްބަރު 7 ގައި ބޭއްވި ރިޔާސީ އިންތިޚާބުގެ ފުރަތަމަ ބުރު އެއީ ބާޠިލް އިންތިޚާބެއް ކަމަށް ސުޕްރީމް ކޯޓުން ކަނޑައެޅުއްވުމާއި ގުޅިގެން އަމިއްލަ ގޮތުން އިންތިހާބުގައި ވާދަ ކުރެއްވި ރިޔާސީ އިންތިޚާބުގައި ރައީސް ޑރ. މުޙައްމަދު ވަޙީދު ވާދަ ނުކުރެއްވުމަށް ނިންމަވައިފި އެވެ.
ވަހީދު މިގޮތަށް ނިންމެވި އިރު، އެ މަނިކުފާނުގެ ރަނިންމޭޓް އަދި ޑީއާރްޕީގެ ލީޑަރު އަހުމަދު ތަސްމީން އަލީ ވަނީ އެމްޑީޕީގެ ރިޔާސީ ކެންޑިޑޭޓް މުހައްމަދު ނަޝީދަށް ތާއީދު ކުރައްވަން ނިންމަވައިފަ އެވެ.
ވޯޓުލުމުގެ ޙައްޤު ލިބިގެންވާ މީހުންގެ ދަފްތަރު އެކުލަވާލުމާއި، ވޯޓުލުމަށްޓަކައި ރަޖިސްޓްރީ ކުރުމާއި އިންތިޚާބާ ގުޅޭ އެ ނޫން ވެސް ކަންކަމުގައި ގިނަ މައްސަލަތަކެއް ހުރިކަމަށާއި، އިންތިޚާބުގައި ވާދަކުރި ފަރާތްތަކަށް އިންތިޚާބުގައި އަލުން ވާދަ ކުރުމާއި ނުކުރުމުގެ ޙައްޤު ލިބިގެންވާ ކަމުގައި، ސުޕްރީމް ކޯޓުން ނިންމަވާފައި ވަނިކޮށް، ރައީސް މި ގޮތަށް މި ނިންމެވީ، އިލެކްޝަންސް ކޮމިޝަނުގެ މިނިވަންކަމާއި ނަޒާހަތްތެރި ކަމާ މެދު ކަންބޮޑުވާފަދަ ޝަކުވާތަކެއް ކުރަމުންދާ ދަނޑިވަޅެއްގައި، އިތުރު މައްސަލަތައް އުފަން ނުކުރައްވައި އެ މަނިކުފާނުގެ އަމިއްލަފުޅު މަޞްލަޙަތަށް ވުރެ ޤައުމީ މަޞްލަޙަތު އިސް ކުރެއްވުމުގެ ގޮތުން ކަމަށް ރައީސް އޮފީހުން ނެރުނު ބަޔާނެއްގައި ބުނެ އެވެ.
ރައީސް މިގޮތަށް ނިންމެވި ނަމަވެސް، ހިނގަމުން މިދާ ރިޔާސީ ދައުރު ނިމެންދެން ރައީސްގެ މަޤާމުގައި އެ މަނިކުފާނު ދެމި ހުންނަވާނެ އެވެ.
އަދި ކުރިއަށް އޮތް ތަނުގައި، ސުލްޙަ މަސަލަސްކަމާއި ހަމަޖެހުން ދަމަހައްޓައި، އިންތިޚާބުގެ ކަންތައްތައް އިންސާފުވެރިކަމާ އެކު ކުރިއަށް ގެންދިއުމަށް ސަރުކާރުން ކުރައްވަން ޖެހިވަޑައިގަންނަވާ ކޮންމެ ކަމެއް އެ މަނިކުފާނު ކުރައްވަމުން ގެންދަވާނެ ކަމަށް ރައީސް އޮފީހުން ބުނެ އެވެ.