އަންނަ ހޮނިހިރު ދުވަހު ބާއްވާ ރިޔާސީ އިންތިޚާބަށް ތާއީދު އިތުރު ކުރުމުގެ ގޮތުން އެމްޑީޕީގެ ރިޔާސީ ކެންޑިޑޭޓް އަދި ކުރީގެ ރައީސް މުޙައްމަދު ނަޝީދުގެ ރަނިންމޭޓް ޑރ. މުސްތޮފާ ލުތުފީ ފުވައްމުލަކަށް ހާއްސަ ކެމްޕެއިން ދަތުރުފުޅެއް މިއަދު ފައްޓަވައިފި އެވެ.
މިއަދު ހެނދުނު ފުވައްމުލަކަށް ވަޑައިގެން ހަރަކާތްތެރިވުމަށް ހަމަޖެހިފައި ވަނީ ދަޑިމަގު އަދި ދިގުވާޑު އަވަށުގަ އެވެ.
އެއަށް ފަހު މާދަމާ މިސްކިތްމަގު، މާލެގަން، މާދަޑު، އަދި ދޫޑިގަން އަވަށުގައި ކެމްޕެއިން ހަަރަކާތްތައް ކުރިއަށް ގެންދަވާނެ އެވެ. ހޯމަ ދުވަހު އެ މަނިކުފާނު ހަރަކާތްތެރިވެ ވަޑައިގަންނަވާނީ ދޫޑިގަން، ފުނާޑު، އަދި ދަޑިމަގު އަވަށުގަ އެވެ. އަދި، އަންގާރަ ދުވަހު ފުވައްމުލަކުގެ މި ކެމްޕެއިން ދަތުރުފުޅު ނިންމަވާ ގޮތަށް ވެސް ވަނީ ހަމަޖެހިފަ އެވެ.
ފުވައްމުލަކުގައި ހިންގާ ކެމްޕެއިން ހަރަކާތްތަކުގެ ތެރެއިން އެންމެ އިސް ކަމެއް ދެއްވުމަށް ހަމަޖެހިފައި ވަނީ ދޮރުން ދޮރަށް ހިންގަވައި އެމްޑީޕީއަށް ކުރިން ލިބުނު ތާއީދަށް ވުރެ ބޮޑު ތާއީދެއް ހޯދުމުގެ ގޮތުން ރައްޔިތުންނާއި ބައްދަލުު ކުރައްވާ އެމްޑީޕީގެ މެނިފެސްޓޯގައިވާ ކަންތައްތައް އޮޅުންފިލުވައި ދެއްވުމެވެ.
މީގެ އިތުރުން ކަންމަތީ ބައްދަލުވުންތަކާއި އަދި އެދުވަހަކު ހަރަކާތްތެރިވާ ސަރަހައްދުގައި ކަންމަތީ ޖަލްސާ ބޭއްވުމަށް ރާއްވަވައިފައިވެ އެވެ.