ބޮލީވުޑްގެ މަޝްހޫރު ލަވަ ކިއުންތެރިޔާ ސޯނޫ ނިގާމަށް އިންޑިއާގެ ގޭސްގްސްޓާރުންތަކެއް މަރުކަޒުގެ އިންޒާރު ދީ ބިރު ދައްކަމުން ދަނިކޮށް، މަޝްހޫރު ޑައިރެކްޓަރު އަދި ޕްރޮޑިއުސަރު ކަރަން ޖޯހަރަށް ވެސް މަރުގެ އިންޒާރުގެ އިތުރުން ބިރު ދެއްކުމުގެ ކޯލްތަކެއް ލިބޭ މައްސަލައެއް މުމްބާއީގެ ފުލުހުންނަށް ރިޕޯޓްކޮށްފި އެވެ.
އެކަން ފުލުހުން ކަށަވަރުކޮށް ދިން ނަމަވެސް އިތުރު ތަފުސީލެއް މިހާތަނަކަށް ނުދެ އެވެ.
"ކުޗް ކުޗް ހޯތާ ހޭ" އާއި "ސްޓޫޑަންޓް އޮފް ދި އިޔާ" ފަދަ ކާމިޔާބް ފިލްމްތައް ޑައިރެކްޓްކޮށްފައިވާ ކަރަން އަށް ލިބެމުންދާ އިންޒާރުތަކާ ގުޅިގެން އޭނާ އަށް 24 ގަޑި އިރު ސެކިއުރިޓީ ވެސް ފުލުހުން މިހާރު އަންނަނީ ދެމުންނެވެ.
މީގެ ކުރިން ވެސް "ކަލް ހޯ ނަހޯ"، "ދޯސްތާނާ" އަދި "ޔެ ޖަވާނީ ހޭ ދިވާނީ" ފަދަ ކާމިޔާބް ފިލްްމްތައް ޕްރޮޑިއުސްކޮށްފައިވާ ކަރަން އަށް މިފަދަ އިންޒާރުތަކެއް ލިބުމާ ގުޅިގެން ފުލުހުންގެ ސެކިއުރިޓީ އަށް އޭނާ އެދިފައިވެ އެވެ.
އެނގިފައިވާ ގޮތުގައި ފާއިތުވި މަސް ދުވަހުގެ ތެރޭގައި އިންޒާރުގެ ކޯލްތަކާ ގުޅިގެން ކަރަން ހުރީ ވަރަށް ބޮޑު ނުތަނަވަސް ކަމެއްގެ ތެރޭގަ އެވެ.
ބޮލީވުޑްގެ ފަންނާނުނަށް ގޭސްގްސްޓާރުން ބިރު ދައްކައި، ފައިސާގެ ބޮޑެތި އަދަދުތަކަށް ޑިމާންޑް ކުރުމަކީ އާ ކަމެއް ނޫނެވެ. މިއީ ވަރަށް ކުރިއްސުރެ ފެށިގެން ވެސް ހިނގަމުން އަންނަ ކަމެކެވެ.
އެހެން ނަމަވެސް މިފަދަ ހާދިސާތަކުގެ މައްޗަށް ބޮލީވުޑްގައި ދޭތެރެ ދޭތެރެ އިން ފިލްމް ވެސް ހަދަ އެވެ.
އެހެން ނަަމަވެސް މިކަމާ ބައެއް ފަންނާނުން ގަންނަ ބިރަކުން އެފަދަ ވާހަކަތައް މީޑިއާގައި އާންމުކޮށް ދައްކައެއް ވެސް ނަހަދަ އެވެ.
ސޯނޫ ވެސް އޭނާ އަށް ބިރު ދައްކާ މައްސަލަ މިހާތަނަށް ފުލުހުންނަށް ރިޕޯޓް ވެސް ކޮށްފައެއް ނުވެ އެވެ.