ރައީސް އަބްދުﷲ ޔާމީންގެ ސަރުކާރުން ފާއިތުވި 5 އަހަރު ހަދާފައިވަނީ އައްޑޫގައި އެންމެ ކިލޯ މީޓަރެއްގެ މަގުކަމަށާއި، މި ސަރުކާރުން އައްޑޫގެ 107 ކިލޯ މީޓރަު މަގު ހަދާނެކަމަށް އެމްޑީޕީގެ ޓިކެޓުގައި އައްޑޫގެ މޭޔަރުކަމަށް ވާދަކުރައްވާ އަލީ ނިޒާރު ވިދާޅުވެއްޖެއެވެ.
ނިޒާރު ވިދާޅުވީ ފޭދޫ ރަށްދެބައި މަގުގެ 07 ކިލޯ މީޓަރު މަގު މިދިޔަ ސަރުކާރުން ހެދިއިރު ދެން ހަދާފައިވަނީ ހިތަދޫ ރަށްދެބައި މަގުގެ 0.4 ކިލޯ މީޓަރު މަގު ކަމަށެވެ.
އިންޑިއަން އެގްޒިމް ބޭންކުގެ 800 މިލިއަން ޑޮލަރުގެ ލައިން އޮފް ކްރެޑިޓްގެ (އެލްއޯސީ) ދަށުން މިއަދު ވަނީ އައްޑޫގެ މަގު ހެދުމާއި ފެން ހިންދާ ނިޒާމު ގާއިމް ކުރުމަށް 1.19 ބިލިއަން ރުފިޔާގެ އެއްބަސްވުމުގައި ސޮއިކޮށްފައެވެ.
ނިޒާރު ވިދާޅުވީ މި ސަރުކާރުގެ ފަސް އަހަރު ނިމިގެންދާނީ މަގުތައް ރަނގަޅުފެންވަރަކަށް ހެދި، ސީސީޓީވީ ކެމެރާ ހަރުކުރެވި ޓްރެފިކް ނިޝާންތައް ޖެހިގެން ކަމަށެވެ.
ނިމިގެން ދިޔަ ސަރުކާރުގައި ތަފާތު ފަހަރުމަތިން އައްޑޫގެ މަގު ހެދުމަށް އެކި ފަރާތްތަކާއި ހަވާލުކުރިއެވެ. އޭގެ ތެރޭގައި ލަންކާގެ ސިއެރާ ކުންފުންޏާއި ހަވާލު ކުރެވުނު ކަމަށްވެސް އޭރު ސަރުކާރުން ބުންޏެވެ. ނަމަވެސް ވެރިކަން ނިމިގެން ދިޔައީ އައްޑޫގެ އެއްވެސް މަގެއް ނެހެދުނުތާ ވެލި މަގުތައްވެސް ނުބެލެހެއްޓި އާއްމުންގެ ޝަކުވާ އިންތިހާއަށް ބޮޑުވެފައި ވަނިކޮށެވެ.