މިއަދު އައްޑޫ ސިޓީ ސިޓީ ސްކްއާގައި ބަޔަކު ކަނޑުފޭރޭ މީހުންގެ ދިދައެއް ނަގައިފި އެވެ.
މިކަން ކުރީ ކޮން ބަޔަކުކަން އަދި ނޭނގޭ ކަމަށާއި، މިކަންކޮށްފައި ވަނީ ރޭގެ ވަގުތެއްގައި ކަމަށް އެ ސަރަޙައްދުގަައި ހަރަކާތްތެރިވަމުން ދިޔަ ޕޮލިހުންގެ އޮފިޝަލަކު ވަނީ މަޢުލޫމާތު ދީފަ އެވެ.
އިތުރަށް އޭނާ ބުނެފައި ވަނީ ދިދަ ނެގި މީހުން އެހެން ބަޔަކަށް ދިދަ ތިރި ނުކުރެވޭ ގޮތަށް ހޮޅީގައި ހުންނަ ހެންޑެލި ލައްވާތަނަށް ތެރަސް އަޅާފައިވާ ކަމަށެވެ.
ފުލުހުން ވަނީ މިހާރު ދިދަ ހަރުކޮށްފައި ހުރި ނަރުގަނޑު ބުރިކޮށްލައިގެން ދިދަ ތިރިކޮށްފައެވެ.
ސިޓީ ސްކެއާގައި ބެހެއްޓި 75 ފޫޓްގެ ބޮޑު ދިދަ ދަނޑީގައި ގައުމީ ދިދަ ނުނަގާތާ ގިނަ ދުވަސްތަކެއްވެފައިވާ އިރު، ދިދަ ދަނޑި އަށް ވަނީ އެކި ވަރުގެ ގެއްލުންތަކެއް ވެސް ލިބިފަ އެވެ.
އެގޮތުން ދިދަ ދަނޑީގައި ކޮޅުގައި އިންނަ ކުރިބޯށި ވެސް ވަނީ ހަލާކުވެގެން ވެއްޓިފަ އެވެ.