ކޮވިޑަށް ފަރުވާ ދެމުން ދިޔަ ދިވެހި އަންހެނަކު މަރުވެއްޖެއެވެ.
މައުލޫމާތު ލިބިފައިވާ ގޮތުގައި މަރުވެފައިވަނީ ހުޅުމާލެ ކޮވިޑް ފެސިލިޓީގައި ފަރުވާދެމުން ދިޔަ އުމުރުން 80 އަހަރުގެ މީހެކެވެ.
މިއީ ރާއްޖެއިން މި ބަލީގައި މަރުވި 61 ވަނަ މީހާއެެވެ.
މާލެ ސަރަހައްދުގައި ކޮވިޑު ޖެހޭ މީހުންގެ އަދަދު އިންތިހާއަށް މަތިވެފައިވާ އިރު ރޭގެ ނިޔަލަށް 162 މީހަކަށް ފަރުވާ ދެމުން އަންނަނީ ހޮސްޕިޓަލުގައި އެޑްމިޓުކޮށްގެންނެވެ. އޭގެ ތެރެއިން ހަތަރު މީހަކަށް އައިސީޔޫގައި މިހާރުވެސް ފަރުވާ ދެމުން އަންނައިރު އެކަކު ވަނީ ވެންޓިލޭޓަރަށްލާފައެވެ.
އެޗްޕީއޭއިން ވަނީ ކޮވިޑު ކޮންޓްރޯލް ކުރުމަށް މާލެ ސަރަހައްދަށް ގިނަ ފިޔަވަޅުތަކެއް އަޅާފައެވެ. ނަމަވެސް އެފިޔަވަޅުތަކުން މާ ބޮޑު ބަދަލެއް ފެނިފައި ނުވާ އިރު ކޮންމެ ދުވަހަކުވެސް ގިނަ ބަޔަކު ކޮވިޑަށް ޕޮޒިޓިވްވަމުން އަންނާތީ ސިއްހީ މާހިރުވަނީ ބިރުވެރި އިންޒާރުތަކެއް ދީފައެވެ. އެގޮތުން މި ބަލީގައި މަރުވާ މީހުންގެ އަދަދު އިތުރުވެދާކަމުގެ އިންޒާރުވަނީ ދީފައެވެ.