ލޯކަލް ކައުންސިލް އިންތިހާބު ބޭއްވުމަށް އިތުރަށް ބޭނުންވާ ފައިސާ ނުލިބި އިންތިހާބު ނުބޭއްވޭނެކަމަށް އިލެކްޝަން ކަމިޝަން (އީސީ)ގެ ރައިސް އަހުމަދު ޝަރީފު ވިދާޅުވެއްޖެއެވެ.
ރައްޔިތުންގެ މަޖިލީހުގެ މާލިއްޔަތު ކޮމެޓީގައި މިއަދު ވާހަކަފުޅު ދައްކަވަމުން ޝަރީފު ވިދާޅުވީ އިންތިހާބު ބޭއްވުމަށް ހިނގާ ހަރަދު ބޮޑުވަނީ ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ގައިޑުލައިންނާއި އެއްގޮތަށް ލޯކަލް ކައުންސިން އިންތިހާބު ބާއްވާތީ ކަމަށެވެ. އަދި އެކަމަށް ބޮޑު ހަރަދެއް ހިނގާ އިރު އެފައިސާ ނުލިބި އިންތިހާބު ނުބޭއްވޭނެކަމަށެވެ.
ޝަރީފު ވިދާޅުވީ އެންމެ ބޮޑު ހޭދައެއް ހިނގަނީ ވޯޓުލާ މަރުކަޒުގެ ކަންކަން އެޗްޕީއޭގެ ގައިޑުލައިންނާއި އެއްގޮތަށް ކުރުމަށް ކަމަށެވެ. އެގޮތުން ކޮންމެ ވޯޓުލާ މަރުކަޒަކަށް އިތުރަށް ތިން އޮފިޝަލުން ނަގަން ޖެހޭކަމަށެވެ.
"އަޅުގަނޑުމެން އެބަޖެހޭ ކޮންމެ ވޯޓުލާ މަރުކަޒަކަށް ކިއު ބަލަހައްޓަން މީހަކު ބަހައްޓަން، އެމީހާ ޖެހޭ ވޯޓުލާން ގޮސް ތިބި މީހުން ތިބީ ގައިދުރުކޮށްތޯ ބަލައި، މާސްކު އަޅައިގެން ތިބިތޯ ބަލަން، އެގޮތަށް ކޮންމެ މަރުކަޒަކަށް އެބަ ބޭނުވޭ އިތުރު ތިން މީހުން، މިއީވެސް ވަރަށް ބޮޑު ހަރަދެއް ހިނގާ ކަމެއް"
ލޯކަލް ކައުންސިލް އިންތިހާބަށް ދައުލަތުން ކަނޑައަޅާފައިވަނީ 51 މިލިއަން ރުފިޔާގެ ބަޖެޓެކެވެ. ނަމަވެސް އެޗްޕީއޭގެ ގައިޑުލައިނާއި އެއްްގޮތަށް އިންތިާބު ބާއްވަން އިތުރު 42 މިލިއަން ރުފިޔާ ބޭނުންވާ ކަމަށް ޝަރީފު ވަނީ ވިދާޅުވެފައެވެ.
ޝަރީފު ވިދާޅުވީ އިންތިހާބު ބޭއްވުމަށް އިތުރަށް ބޭނުންވާ ފައިސާ ހޯދުމާއި ގުޅޭ ގޮތުން ފިނޭންސް މިނިސްޓަރ އާއި އެކުވެސް މަޝްވަރާ ކުރެވިފައިވާ ކަމަށެވެ. ނަމަވެސް މަޖްލިސްއިން އިތުރު ބަޖެޓެއް ފާސް ނުކުރަނީސް ފައިސާ ދެެވެން ނެތްކަމަށް ފިނޭންސް މިނިސްޓަރ ވިދާޅުވެފައިވާކަމަށް ޝަރީފު ވިދާޅުވިއެވެ.