ބްރޯޑްކާސްޓިން ކަމިޝަން (ބްރޯޑުކޮމް)ގެ މެމްބަރުކަމަށް ރާއްޖެޓީވީގެ ޕްރެޒެންޓަރ މުހައްމަދު އައްޔަން ކުރުމަށް ރައްޔިތުންގެ މަޖިލީހުން މިއަދު ފާސްކޮށްފިއެވެ.
ބްރޯޑުކޮމްއަށް އައްޔަން ކުރުމަށް 10 މީހެއްގެ ނަން ރައްޔިތުންގެ މަޖިލީހަށް ފޮނުވާފައިވާ އިރު ރައްޔިތުންގެ މަޖިލީހުގެ މިނިވަން މުވައްސަސާ އާއި ބެހޭ ކޮމެޓީން ދިރާސާ ކުރުމަށް ފަހު މަޖްލީހުގެ ތަޅުމަށް ފޮނުވާފައިވަނީ ފަޒީންގެ އިތުރުން ކުރީގެ ވީޓީވީގެ ޕްރެޒެންޓަރ ޝިފްޒާ މުސްޠަފާގެ ނަމެވެ.
މިއަދު މަޖްލީހުގައި ވޯޓަށް އެހީ ކޮމެޓީން މަޖްލިސްގެ ތަޅުމަށް ނަން ފޮނުވި ތަރުތީބުންނެވެ. އެގޮތުން އެންމެ ފުރަތަމަ ވޯޓަށް އެެހީ ފަޒީނުގެ ނަމަށެވެ.
ބްރޯޑުކޮމް އަށް އައްޔަން ކުރުމަށް ފަޒީނުއަށް މަޖްލިސްގައި ތިއްބެވި 57 މެމްބަރުންގެ ތެރެއިން 55 މެމްބަރަކު ވަނީ ވޯޓު ދެއްވާފައެވެ.
ބްރޯޑްކޮމްގެ މެމްބަރުކަމުގެ ގޮޑި ހުސްވީ، ކޮމިޝަންގެ މެމްބަރުކަން ކުރެއްވި ޒީނާ ޒާހިރު ވަކި ކުރުމުގެ މަސައްކަތް މަޖިލީހުން ކުރަމުން ދަނިކޮށް، އަމިއްލަފުޅަށް މަގާމުން އިސްތިއުފާ ދެއްވުމާ ގުޅިގެންނެވެެ.