ފެނަކަ އިންސްޓިޓިއުޓް ފޯރ ޓްރެއިނިންގ އެންޑް ރިސާރޗް ފެ ފަރާތުން މެކޭނިކަލް ދާއިރާއިން ކިޔެވުމުގެ ފުރުސަތު ހުޅުވާލައިފިއެވެ.
ފެނަކަ ކޯޕަރޭޝަން އިން ބުނީ ގާބިލް ފަންނީ ޒުވާނުންނަށް އިންޖިނިއަރިންގެ ދާއިރާއިން ކުރިއަށް ދިއުމުގެ ފުރުސަތު ހޯދައި ދިނުމަށް ފެނަކަ "ފުނަރު: ޕްރޮގްރާމް މެދުވެރިކޮށް ފަހި ފުރުސަތުތަކެއް ހުޅުވާލާފައިވާ ކަމަށެވެ. އެގޮތުން އިންޖީން ރިޕެއަރ އެންޑް މެއިންޓެނަންސް ޕްރޮގުރާމުން ދެ ޖިންސުގެ ޒުވާނުންނަށް ފުރުސަތު ހުޅުވާލާފައިވާ ކަމަށެވެ.
ފެނަކަ ކޯޕަރޭޝަންއިން ބުނީ ކަރަންޓުގެ ހިދުމަތް ފޯރުކޮށްދޭ ރަށްރަށުގައި ކޮންމެހެން ކުރަން ޖެހޭ މެކޭނިކަލް މަސައްކަތްތައް ކުރަން ޖެހިފައި އޮންނަނީ އެކަމުގެ ފަންނީ އިލްމާއި ތަޖުރިބާ ހުރި މުވައްޒަފުންގެ މަސައްކަތު ތާވަލަށް ބިނާކޮށް ކަމަށެވެ. އަދި މިކަމުގެ ސަބަބުން ދިމާވާ މައްސަލަތައް ހައްލުކުރުމަށް ލަސްތަކާއި ކުރިމަތިވެ، ރައްޔިތުންނަށް ފޯރުކޮށްދެންޖެހޭ އަސާސީ ހިދުމަތްތައް ހަލުވިކަމާއިއެކު ފޯރުކޮށްދިނުމަށް ގޮންޖެހުންތަކާއި ކުރިމަތިލާން ޖެހޭކަމަށް ފެނަކައިން ބުނެއެވެ.
ފެނަކައިން ބުނީ މިފަދަ ކަންކަން ހައްލުކޮށް އެތަނުގެ މުވައްޒަފުންނަކީ މަސައްކަތަށް ގާބިލް ތަމްރީނު ލިބިފައިވާ ބަޔަކަށް ހެދުމަކީ ކުންފުނީގެ މެނޭޖިން ޑިރެކްޓަރ އަހުމަދު ސައީދުގެ ދުރު ވިސްނުންފުޅެއް ކަމަށެވެ. އަދި ފެނަކަ އިންސްޓިޓިއުޓު އުފެއްދީވެސް އެމަގްސަދު ހާސިލް ކުރުމަށް ކަމަށެވެ.
"ފުނަރު ޕްރޮގުރާމް އިން އިންޖީން ރިޕެއަރ އެންޑް މެއިންޓެނަންސް" އަކީ ތިއަރެޓިކަލް ބަޔާއި ޕްރެކްޓިކަލް ބައި ހިމެނިގެން 03 މަސް ދުވަހުގެ މުއްދަތަކަށް ކުރިއަށް ގެންދާ ޕްރޮގުރާމެކެވެ. މި ކޯސް ރާއްޖޭގެ އެކިއެކި ސަރަހައްދުތަކުގައި ހިންގުމަށް ވަނީ ހަމަޖެހިފައެވެ.
އަދި މިކޯހަށް 16 އަހަރުން މަތީގެ ކޮންމެ ދިވެއްސަކަށްވެސް ކުރިމަތިލެވޭގޮތަށް އާއްމުކޮށް ވަނީ ހުޅުވާލާފައެވެ. މި ކޯހަށް ދެ ޖިންސުގެ ޒުވާނުންނަށް ވެސް ކުރިމަތިލެވޭނެކަމަށް ފަނަކައިން ބުނެއެވެ.