ސިޔާސީ ހަރަކާތްތަކަށް ރަށްރަށުގެ ބަނދަރު މަތީގެ ތަންތަން ބޭނުން ކުރަން އައްޑޫ ސިޓީ ކައުންސިލުން އަންގާފައި ވަނިކޮށް ސ. ފޭދޫ ބަނދަރުގެ ބޮޑު ބައެއް އެމްޑީޕީން "ހިސޯރު" ކުރުމާ ގުޅިގެން ފޭދޫ ޕީޕީއެމުން ގޮފިން ވެސް ބަނދަރު މަތީގައި ސްޓޭޖެއް ހެދުމުގެ މަަސައްކަތް ފަށައިފި އެވެ.
ސިޔާސީ ކަންކަމަށް ބަނދަރު ބޭނުން ކުރަން އެދި އެމްޑީޕީގެ ކޮންޓްރޯލް އޮތް އައްޑޫ ސިޓީ ކައުންސިލުން ސެޕްޓެމްބަރު 7 ގެ ކުރިން ބޭއްވި ބާތިލް ކުރި ރިޔާސީ އިންތިހާބުގެ ފުރަތަމަ ބުރުގެ ކެމްޕޭން ތެރޭގައި ބަޔާނެެއް ނެރެފައި ވަނިކޮށް އެމްޑީޕީ ފޭދޫ ގޮފިން ވަނީ ބަނދަރު މަތީގައި ސްޓޭޖެއް ހަދައި ދިދަ ފައްޗާއި ބެނާތައް ދަމައި ޖޯލި ފައްޗާއި އުނދޯއްޔާއި ކުޑަ ފަދަ ތަކެތި އެތަނުގައި ޖަހައިގެން ސިޔާސީ ހަރަކާތްތައް ހިންގަން ފަށައިފަ އެވެ.
މިކަމާ ގުޅިގެން ޕީޕީއެމުން ފޭދޫ ބަނދަރާ ދިމާލުން އެ ޕާޓީން ބޭނުން ކުރާ ތަނުގައި ވެސް ސްޓޭޖެއް ހެދުމުގެ މަސައްކަތް ވަނީ ފަށައިފަ އެވެ. ޕީޕީއެމުން އެތަނުގައި ދިދަ ފަތި ދަމައި، ސިޔާސީ ހަރަކާތްތައް ހިންގި ނަމަވެސް، އެ ބިމުގައި އެއްްވެސް "ދާއިމީކޮށް" ތަން ހިސޯރުކޮށްފައެއް ނުވެ އެވެ.
އެކަމަކު އެ ތަނުގައި ޕީޕީއެމްގެ ބޮޑު ދިދައެއް ނަގާފައިވެ އެވެ.
އެކަމަކު އެމްޑީޕީން ކައުންސިލްގެ އެންގުމާ ވެސް ހިލާފަށް އަމަލު ކުރާތީ، އެެހެން ޕާޓީތަކުން ވެސް އެ ބަޔަކަށް ފެންނަ ގޮތަކަށް ދަނީ ކަންކަން ކުރަމުންނެވެ.