ސ. މީދު އާއި އެ ރަށާ ކައިރީ އޮންނަ އިސްމެހެލާހެރަ އާ ދެމެދުން ކޮންނަމުންދާ ނެރު ކޮނުމުގެ މަސައްކަތް ހުޅުމީދޫ ބަނދަރު ކޮނުމުގެ މަސައްކަތް ކުރަމުންދާ ސްރީލަންކާގެ ކުންފުންޏާ ސަރުކާރުން ހަވާލްކޮށްގެން އެކުންފުނިން ނެރު ފުން ކުރުމުގެ މަސައްކަތްފަށައިފިއެވެ.
ފުޅާ މިނުގައި 300 ފޫޓް ދިޔަވަރު ހިކި ވަގުތުގައި ފުންމިނުގައި ފަސް މީޓަރު ހުންނަ ގޮތަށް ކޮންނަމުންދާ މި ނެރު ކޮނެ ނިމުމުން އެއްވެސް ދަތި ކަމެއް ނެތި އޮޑިދޯނިފަހަރަށް ވަދެ ނިކުމެވޭނެ އެވެ.
މި މަސައްކަތް ކުރަމުން އަންނަނީ ޝަންގްރިއްލާ ވިލިގިލި ރިސޯޓްގެ ފަރާތުން ފޮނުވައި ދިން އެކްސްކަވޭޓަރެއް ބޭނުންކޮށްގެންނެވެ.
އެ ރިސޯޓުން މި އެކްސްކަވޭޓަރު ފޮނުވައި ދިނީ މީދޫގެ ފަޅުތެރެއިން ވިލިގިލި ރިސޯޓްގެ ގޮޑުދޮށް ރީތި ކުރުމަށް ވެލި ނެގުމުގެ ހުއްދަ
ދިނުމުންނެވެ.
ޝަންގްރިއްލާ ވިލިގިލި ރިސޯޓަށް ބޭނުންވާ ވަރަށް މީދޫ ފަޅުތެރެއިން ދޮން ވެލި ނަގައި ނިމުނު އިރު ވެސް ޝަންގްރިއްލާ އިން ފޮނުވި އެކްސްކަވޭޓަރު ބޭނުންކޮށްގެން ކޮންނަމުން ދިޔަ ނެރުމުގެ މަސައްކަތް އޮތީ ނުނިމި އެވެ.
އެންމެ ފަހުން ޝަންގްރިއްލާގެ ފަރާތުން ފޮނުވި އެކްސްކަވޭޓަރު އެ ފަރާތުން ވަނީ ގެންގޮސްފަ އެވެ. އަދި އޭގެ ފަހުން ހެރަތެރަ ރިސޯޓްގެ ގޮޑުދޮށް ރީތި ކުރުމަށް މީދޫ ފަޅުތެރެއިން ދޮންވެލި ދޭ ގޮތަށް ހެރަތެރަ ރިސޯޓްގެ ފަރާތުން ވެސް ބަޔަކާއި ހަވާލްކޮށްގެން ނެރު ފުން ކުރުމުގެ މަސައްކަތްކޮށްފައިވެ އެވެ.
މި ނެރު ފުން ކުރުމަށް ކުރެވުނު މަސައްކަތްތަކުން މަސައްކަތް ނުނިމި ދިގުލައިގެން ގޮސްފައި ވަނިކޮށް ޖުމްހޫރީ ޕާޓީގެ ރިއާސީ ކެންޑިޑޭޓް ގާސިމް އިބްރާހިމް މި އަހަރުގެ ފެބްރުއަރީ މަހުގެ 4 ވަނަ ދުވަހު މީދު އަށް ވަޑައިގެންނެވުމުން މީދޫ ރައްޔިތުންގެ ފަރާތުން ބަޔަކު ގާސިމާ ބައްދަލުކޮށް ނެރު ފުންކޮށް ދެއްވުމަށް އެދިފައިވެ އެވެ.
އެހެން ނަމަވެސް ގާސިމް ވިދާޅުވި ގޮތަށް މި މަސައްކަތް ނުފެށި ލަސްވަމުންދާތީ ރައީސް ޑރ. މުހައްމަދު ވަހީދަށް މީދޫ ރައްޔިތުން ހުށަހެޅުމުން ރައީސް ވަހީދު ވަނީ އެ މަސައްކަތް ފައްޓަވައި ދެއްވާފަ އެވެ.