އެމްޑީޕީގެ ރިޔާސީ ކެންޑިޑޭޓް މުޙައްމަދު ނަޝީދުގެ ރަނިންމޭޓް ޑރ. މުސްތަފާ ލުތުފީ ރޭ އައްޑު އަށް ވަޑައިގެން މިއަދު އައްޑޫގެ ޓީޗަރުންނާއި ނަރުހުންނާ ބައްދަލު ކުރައްވައިފި އެވެ.
މުސްތޮފާގެ މި ދަތުރުފުޅުގައި މިއަދު ހެނދުނު ވަނީ ކެމްޕެއިން ޓީމް އާއި ކައުންސިލަރުންގެ އިތުރުން ދާއިރާތަކުގެ ރައީސުންނާއި ބައްދަލު ކުރައްވާފަ އެވެ.
މި ބައްދަލުވުމުގައި މައިގަނޑު ގޮތެއްގައި ކުރިއަށް ގެންދެވީ ކެމްޕެއިންގެ މަޝްވަރާތަކެވެ.
މީގެ އިތުރުން މުސްތަފާ ވަނީ މިއަދު އައްޑޫގައި މަސައްކަތް ކުރާ ޓީޗަރުންނާއި ބައްދަލު ކުރައްވާފަ އެވެ.
މި ބައްދަލުވުމުގައި އެމްޑީޕީގެ ތައުލީމީ ސިޔާސަތާ ގުޅޭ މައުލޫމާތު ދިނުމުގެ އިތުރުން ޓީޗަރުންގެ ސުވާލުތަކަށް ޖަވާބު ވެސް އެމަނިކުފާނު ވަނީ ދެއްވާފަ އެވެ.
ޓީޗަރުންގެ މައިގަނޑު ސުވާލުތައް އަމާޒު ކުރެވިގެން ދިޔައީ މުސާރަ އާ ގުޅޭ ގޮތުންނެވެ.
މީގެ އިތުރުން މިއަދު ހަވީރު ރަނިންމޭޓް އައްޑޫގެ ނަރުހުންނާއި ބައްދަލު ކުރެއްވުން ވަނީ ބާއްވާފަ އެވެ.
މި ބައްދަލުވުމުގައި ޕާޓީގެ ސިއްޙަތާ ބެހޭ ސިޔާސަތާ ގުޅޭ ގޮތުން މައުލޫމާތު ދެއްވުމުގެ އިތުރުން ނަރުހުންގެ ސުވާލުތަކަށް ޖަވާބު ދެއްވުމުގެ ވަގުތުކޮޅެއް ވެސް ކުރިއަށް ގެންދެވި އެވެ.
މޫސުން ތަންދޭ ނަމަ ހިތަދޫގައި މިރޭ ކަންމަތީ ޖަލްސާއެއް ބާއްވަން ހަމަޖެހިފައިވާއިރު މާދަމާ ހިތަދޫ ފިޔަވައި އެހެން ރަށްރަށުގައި ދޮރުން ދޮރަށް ހިނގެވުމަށް ހަމަޖެހިފައި ވެ އެވެ.
ރަނިންމޭޓްގެ މި ދަތުރުފުޅު ނިންމަވާލެއްވުމަށް ފަހު މާލެ ވަޑައިގަންނަވަން ހަމަޖެހިފައި ވަނީ 18 ވަނަ ދުވަހު އެވެ.