މަރާލާފައިވާ މިނިވަން ނޫހުގެ ނޫސްވެރިޔާ އަހުމަދު ރިލްވާންގެ މައްސަލަ ތަހުގީގުކުރަމުން އަންނަނީ ބޭރުގެ އިންވެސްޓިގޭޓަރަކު ގެނެސްގެންކަމަށާއި، އެމައްސަލައިގެ ފުރިހަމަ ރިޕޯޓު ލިބޭނީ މިއަހަރުގެ ނިޔަލަށް ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރަށްވެހި ފަތިސް ކެމްޕެއިން ބައްދަލުވުމެެއްގައި ވާހަކަދައްކަވަމުން ރައިސް ސޯލިހު ވިދާޅުވީ ރިލްވާންގެ މައްސަލައަކީ ބުރަ އަދި އުނދަގޫ މައްސަލައެއް ކަމަށެވެ. އަދި މައްސަލައިގެ ތަފްސީލް ރިލްވާންގެ އާއިލާ އާއި ހިއްސާ ކުރަމުން އަންނަ ކަމަށް ރައީސް ސޯލިހު ވިދާޅުވިއެވެ.
ރިލްވާންގެ މައްސަލަ ބަލަމުން އަންނަ މަރު ކޮމިޝަނުން މިހާތަނަށް ވަނީ މައްސަލަ އާއި ގުޅުން ހުރި ވަޅި އާއި ބެހޭގޮތުން ސާބިތު ހިފޭވަރުގެ ސައްޚަ މައިލޫމާތު ފޯރުކޮށްދޭ ފަރާތަކަށް 500،000ރ (ފަސް ލައްކަ ރުފިޔާ)ގެ ފައިސާގެ އިނާމެއް ދޭނެ ކަމަށް ބުނެފައެވެ. ކަމިޝަނުން ބުނީ މައްސަލައިގެ ތަހްގީގަށް އެންމެ މުހިއްމު ހެއްކަކީ ވަޅި ކަމަށާއި، ވަޅީ ރާއްޖެއިން ބޭރަށް ފޮނުވައިގެން ތަހްލީލު ކުރަމުން އަންނަ ކަމަށެވެ.
ރިލްވާންގެ މައްސަލަ ތަހްގީގުކުރުމަކީ ރައީސް ސޯލިހުގެ ރިޔާސީ ވައުދެކެވެ. އެމަނިކުފާން ވަނީ ވެރިކަމުގެ ފުރަތަމަ ދުވަހު އެ މައްސަލަ ބަލަން ފަށާނެކަމަށް ވިދާޅުވެފައެވެ.