ސ. ހިތަދޫ މަގެއްގެ މަތީގައި ޕާކްކޮށްފައި އޮތްވައި ރޭ ކާރުގައި ރޯކޮށްލައި ބޮޑެތި ގެއްލުންތަކެއް ދިނީ، ކޮން ބަޔަކު ބޭނުމެއްގައި ކަން ވެސް ނޭނގޭ ކަމަށް އެ ކާރުގެ ވެރިޔާ އަހުމަދު ސައީދު ބުނެފި އެވެ.
އޭނާ މިއަދު ބުނީ ކާރުގައި ރޯކޮށްލާފައި ވަނީ ހިތަދޫ މަސްޖިދުލް ސޫރާ ކައިރީގައި ޕާކްކޮށްފައި އޮތްވައި 11:00 ޖަހާ އެހާކަށްހާ އިރު ކަމަށެވެ.
އެހެން ނަމަވެސް ރޭ ކާރުގައި އުޅުނީ އޭނާ ނޫން ކާރު އޮތީ ރައްޓެއްސެެއްގެ އަތުގައި ކަމަށް ސައީދު ބުންޏެވެ. މި ކާރު އައްޑު އަށް ގެނެސްފައި ވަނީ ދާދި ފަހުންނެވެ.
ބީއެމްޑަބްލިއު ކާރުގައި ރޯކޮށްލުމުގެ ސަބަބުން ސީޓްތައް އަނދައި އެތެރެ އަށް ވަރަށް ބޮޑަށް ގެއްލުންވެފައިވާ އިރު، ކާރުގެ ބިއްލޫރިތައް ވެސް ވަނީ ތަޅައިގެން ގޮސްފަ އެވެ.
މި މައްސަލަ ފުލުހުންނަށް ރިޕޯޓްކޮށްފައި ވަނީ ރޭ 11:20 އެހާކަށްހާ އިރު ކަމަށް ފުލުހުން ބުންޏެވެ.
ފުލުހުން މިހާރު އަންނަނީ މި މައްސަލަ އިތުރަށް ތަހުގީގު ކުރަމުންނެވެ.