ކޮވިޑް-19 އަށް ޕޮޒިޓިވް ވެފައިވާ ހައިރިސްކް މީހުންގެ ތެރެއިން 100 މީހުން ފެސިލިޓީއަށް ދިއުމަށް ދެކޮޅުހަދާ ކަމަށް ހެލްތް ޕްރޮޓެކްޝަން އެޖެންސީ (އެޗްއީއޯސީ)އިން ހާމަކޮށްފިއެވެ.
އެޗްއީއޯސީން ރޭ ބޭއްވި ނޫސްވެރިންގެ ބައްދަލުވުމުގައި މޮނީޓަރިން ކްލަސްޓާގެ ފަރާތުން ސަނާ ސަލީމް ވިދާޅުވީ ކޮވިޑަށް ޕޮޒިޓިވް 1516 މީހަކު މިވަގުތު ހޯމް އައިސޮލޭޝަނުގައި އެބަތިބި ކަމަށެވެ. އޭގެ ތެރެއިން ހޯމް އައިސޮލޭޝަނަށް ފިޓުވަނީ 1405 މީހުން ކަމަށް ވިދާޅުވިއެވެ.
ގޭގައި ތިބި ބައެއް މީހުންގެ ތެރޭގައި ހައިރިސްކް މީހުން ތިބިކަން ފާހަގަކޮށް ސަނާ ވިދާޅުވީ މިދިޔަ 14 ދުވަަށް ބަލާއިރު ހައިރިސްކު 100 މީހުން ފެސިލިޓީއަށް ދިއުމަށް ދެކޮޅުހަދާ ގޭގައި ތިބިކަމަށެވެ.
ސަނާ ވިދާޅުވީ އެފަރާތްތަކަށް ގުޅޭ ހާލު ބަލާ ހަދާކަމަށެވެ. އަދި އެގޮތަށް ގުޅާ ގުޅުމުގައި ޕޭޝަންޓުގެ ފަރާތުން މައްސަލަ އެއް ހުށަހަޅައިފިނަމަ އެކަން ހައްލު ކޮށްދިނުމަށްވެސް މަސައްކަތް ކޮށްދޭކަމަށް ވިދާޅުވިއެވެ.
މިވަގުތު ރާއްޖޭގައި ކޮވިޑް އެކްޓިވް 2،535 ކޭސް ތިބިއިރު އޭގެތެރެއިން 165 މީހަކު ތިބީ ހޮސްޕިޓަލުގައެވެ.